Lettre MCCXXIX. À la Même

Le prince héritier de la couronne de Savoie. - Deux visiteuses attendues au monastère d'Annecy. - Une heureuse novice. - Arrestation de Bonfils ; souhaits du Saint pour le prisonnier.

Annecy, 14 août 1616.

Ma tres chere Fille,

Je vous escrivis des-ja l'autre jour la lettre ci jointe, mais l'homme qui accompaigna monsieur de Monthouz , qui m'avoit rendu la vostre, ne vint point prendre ma lettre, que je sache. Despuis, comme vous aves sceu, Monseigneur le Prince vint icy , a la bonté duquel je suis infiniment obligé, et avec tout le reste du païs je dois mille et mill'actions de graces a la divine Providence qui nous a donné un homme tant plein de vertu et de benedictions pour dominer un jour entre nous. Il failloit que mon cœur rendit ce tesmoignage a celuy de ma tres chere fille, de la consolation que j'ay de voir ce Prince tant rempli de la sainte crainte de Dieu.

Vous pourres venir icy a vostre gré , car nostre Mere n'aura point de plus grand playsir que de vous voir, et ne croy pas quil y ayt aucun danger en chemin ; et ne faut non plus faire difficulté pour madamoyselle de Beaufort . Mays voyés vous, ma tres chere Fille, vous sçaves bien cela, que la Visitation est toute vostre, et nostre Mere et toutes les Seurs, et a madamoyselle de Beaufort, ainsy que vous le jugeres a propos.

La chere niece est si grandement consolee, que son ame est comme une petite pouponne aux mammelles de la douceur caeleste. Je ne luy ay point parlé qu'une fois il y a trois semaines, mais je n'ay pas laissé de connoistre la bonté que Dieu exerce en elle. En somme, Dieu est bon, et bienheureux est le cœur qui l'ayme.

Le sieur Bonfilz a esté saysi ce soir passé, environ les onze heures, et mené prisonnier a Chamberi ou Miolans, par ordre de Monseigneur le Prince . On a quant et quant cacheté ses coffretz et son logis ; cela rendra plus malaysé vostre payement . Je parleray a Messieurs de la justice, pour voir ce qui se pourroit faire pour vostre payement. Ce bon homme ne me voyoit point, des il y a quelque tems, et avoit protesté a Sessel de ne me vouloir jamais aymer, sans quil eut ni rayson ni sujet quelcomque de faire telle declaration; c'est pourquoy, quoy que diverses fois il fut venu icy, je n'avois pas eu moyen de luy parler de vostre affaire. Hier seulement, en passant, il me salua et moy luy. Helas, ma tres chere Fille, Dieu sçait si je luy souhaite les biens infinis de la paix, consolation et grace du Saint Esprit

( Ac 9,11 ; Ga 5,22 ). Mays a vous, ma tres chere Fille, cela ne se peut dire combien mon ame en souhaite, et a nostre chere seur de Mieudri .

Annessi, le XIIII aoust 1616.

Je salue Tres humblement madame la Comtesse et mesdames ses filles et les miennes , car il faut dire ainsy.

Revu sur l'Autographe conservé à la Visitation d'Annecy.