Lettre MCCXXXI. Au Duc Roger de Bellegarde

L'amour parfait exclut les défiances. - La " coustume des peres. " - Un livre qui suppléera à la rareté des lettres. - Eloge du prince de Piémont.

Annecy, 15 août 1616.

Il ne faut jamais, certes, Monsieur, puisque j'ay lhonneur que vous soyes mon tres cher filz, il ne faut point faire d'excuses quand vous ne m'escrives pas ; car je ne puis non plus douter de vostre amour filial envers moy, que je ne puis vivre sans sentir continuellement dedans mon cœur les eslans de l'amour paternel envers vous. Les defiances n'ont point de lieu ou l'amour est parfait. Mays il est vray toutefois, Monsieur mon Filz, que vos lettres m'apportent tous-jours une delectation extreme, y voyant, ou du moins entrevoyant, les traitz de vostre bonté naturelle et de la sainte charité de vostre ame, qui produit et nourrit la douceur de vostre dilection filiale que vous respandes sur moy et qui me remplit de suavité. Faites donq, Monsieur mon Filz, faites souvent, je vous supplie, cette grace a mon esprit, mais seulement pourtant, quand vous pourrés bonnement sans vous incommoder ; car, quoy que vos lettres me soyent plus delicieuses que je ne puis dire, si elles vous coustoyent de l'incommodité elles me seroyent douloureuses, aymant plus vostre playsir que le mien, selon la coustume des peres.

Et moy ce pendant, Monsieur mon tres cher Filz, affin de suppleer en quelque sorte les defautz que le manquement de commodités me pourroyent

(sic) faire faire de vous escrire souvent, je vous envoye le livre de l'Amour de Dieu que j'ay n'a guere exposé aux yeux du monde ; et vous supplie que si quelquefois l'affection que vous aves pour moy, vous donnoyt quelque desir d'avoir de mes lettres, vous prenies ce

Traitté et en lisies un chapitre, vous imaginant que s'il y a point de Theotime au monde auquel s'addresse (sic) mes paroles, vous estes celuy entre tous les hommes, qui estes mon plus cher Theotime.

Le libraire a laissé couler plusieurs fautes en cet œuvre, et moy aussi plusieurs imperfections ( note 604 ); mays sil se treuve des besoignes parfaites en ce monde, elles ne doivent pas estre cherchees en ma boutique. Si vous lises celle ci de suite, elle vous sera plus aggreable a la fin.

Nous avons icy despuis trois jours Monseigneur le Prince de Piemond, qui me fit lhonneur de yenir descendre chez moy tout a l'improuveu, estant venu par les postes, luy septiesme; despuys, il a esté loge au chasteau . C'est le plus doux, gracieux et devot Prince qu'on puisse voir; un cœur plein de courage et de justice, une cervelle pleine de jugement et d'esprit, un'ame qui ne respire que le bien et la vertu, l'amour de son peuple et sur tout la crainte de Dieu. Vous sçaures, je m'asseure, avant la reception de la presente, les causes de sa venue .

Reste, Monsieur mon tres cher Filz tres honnoré, que je vous souhaite toutes les benedictions celestes; et c'est la respiration ordinaire de mon cœur, puisque j'ay la faveur et le bonheur d'estre advoüé vostre Pere, et que je dois estre et suis a jamais,

Vostre tres humble, tres dedié et tres obeissant servi teur,

FRANÇs, E. de Geneve.

xv aoust 1616, Annessi.

Monsieur, c'est tout a la haste que j'escris, et je m'asseure que de Lyon vous recevres un autre livre , selon l'ordre que j'en avois donné. 0 mon Dieu, que je me resjouis de la grossesse de madame vostre seur , qu'on m'asseure.

Revu sur l'Autographe qui se conservait à Evian, chez les Missionnaires de Saint-François de Sales .