Lettre MD. À la Mère de Chantal, a Bourges

(FRAGMENTS)

Jésus crucifié et Jésus glorifié. - Quand est-ce que Dieu supporte notre fardeau avec nous.

Paris, 11 janvier 1619.

Ma Mere toute tres chere,

Si vous n'aves gueres ni d'or, ni d'encens pour offrir a Nostre Seigneur, vous aures au moins de la mirrhe ( Mt 2,11 ), et je voy qu'il l'accepte tres aggreablement, comme si ce fruit de vie vouloit estre confit en la mirrhe d'amertume, tant en sa naissance qu'en sa mort ( Jn 19,39 ). En somme, Jesus glorifié est beau ; mais quoy qu'il soit tous-jours tres bon, si semble-il qu'il le soit encor plus crucifié. C'est, pour ce tems present, vostre Espoux, ma tres chere Mere ; a l'advenir, ce sera luy mesme glorifié.

…………………………………………………………………….

Or sus, c'est Dieu qui veut ainsy mettre nostre cœur au sec ; ce n'est donq pas une rigueur, c'est une douceur.

Voyla que je vous dis, ma tres chere Mere; et tout de mesme pour les nouvelles des desplaysirs de M. [de Chantal .] En fin, Nostre Seigneur, peut estre, nous veut ainsy conduire entre les espines desormais ; et je confesse, pour le regard de moy mesme en moy, qu'il en est bien tems : en vous, je le supplie de toutes mes forces qu'il attrempe tous-jours doucement son calice ; mais que nostre volonté ne soit pas faite, ains la sienne toute sainte ( Lc 22,42 ). Ayés bon courage, car pourveu que nostre cœur luy soit fidele, il ne nous chargera point outre nostre pouvoir, et supportera nostre fardeau avec nous quand il verra que, de bonne affection, nous sousmettrons nos espaules.

..............................................................................

FRANÇS, E. de Geneve.

Le 11 janvier 1619.