Lettre MDXI. À Madame de Veyssilieu

Quatre lignes sorties du cœur. - Aspirer aux contentements de l'éternité à mesure que Dieu nous sèvre de ceux de ce monde.

Paris, 26 mars 1619 .

Ma tres chere Fille,

Si j'estais aupres de vous, je vous dirois bien plus de choses que je n'en sçaurois escrire, et si j'estois en un autre lieu je vous escrirois plus amplement que je ne puis faire en celuy ci. Ces quattre lignes partent de mon cœur pour faire sçavoir au vostre que si je ne l'ay visité de presence en son affliction, ç'a esté, je vous asseure, d'une affection grande et avec beaucoup de sentimens.

Mais en fin, ce pere est trespassé en sorte que, si la foy de la vie eternelle regne en nos espritz comme elle doit, nous devons estre grandement consolés. Petit a petit, Dieu nous sevre des contentemens de ce monde ; oh ! ma tres chere Fille, il faut donq ardemment aspirer a ceux de l'immortalité, et tenir nos cœurs eslevés au Ciel ou sont nos pretentions et ou nous avons meshuy une grande partie des ames que nous cherissons le plus.

Qu'a jamais soit beni le nom de Nostre Seigneur ( Ps 112, 2 ) et que son amour vive et regne au milieu de nos

ames. La mienne salue cordialement la vostre, et suis, ma tres chere Fille, tres parfaitement

Vostre tres humble serviteur,

FRANÇs, E. de Geneve.

A Paris, le Mardi saint.