Lettre MMLXVI. Un Mot de Saint Augustin. - Dieu Répond à Tous Ceux Qui Lui Demandent Conseil ; d'Où Vient Que Beaucoup N'entendent Pas sa Réponse ? - le Serviteur Fidèle. - Comment Combattre la Vaine Gloire. - l'Obéissance Amoureuse et la Simplicité

[1606- 1608.]

( Ms de Nancy )Saint Augustin dit qu'il rapportoit " a Dieu ce qu'il pouvoit voir et penser, bien que ce fust chose de petite consequence et de neant ; toutefois, il luy en demandoit conseil du mieux qu'il luy estoit possible, comme a la Verité qui preside ( De Magistro 11,38 ). " Plusieurs personnes demandent conseil a Dieu de diverses choses ; il respond a tous par une seule response et tout a coup, par parole ouverte et claire ; mais ilz ne l'entendent pas tous-jours, bien qu'il ayt parlé clairement, car ilz s'addressent a luy pour demander conseil de ce qu'ilz veulent, et ilz n'ont pas tous-jours ce qu'ilz demandent. Celuy, a la verité, est tres bon et fidele serviteur

( Mt 25,23 ) qui ne regarde d'avoir response conforme a sa volonté, mais veut seulement ce qu'il oyt et entend estre a Dieu aggreable par la response qu'il luy plaist de faire, conformant sa volonté a celle de la divine .Majesté.

Si tost que l'entendement vous representera quelque gloire ou honneur, ou que le monde vous en donnera, incontinent jettes-les tous aux pieds de Nostre Seigneur par un simple regard, luy baysant les pieds ou les mains.

Saint Pierre dit ( 1 P 1,22 ) : Purifies vos ames en l'obeissance laquelle ne procede pas de la seule necessité, ains d'une franche volonté et desir de plaire a Dieu. La volonté du superieur, en quelque façon que nous la connoissions, nous doit servir de precepte. Les considerations que je desire en vostre obeissance, elles sont toutes en une : car je ne desire que la simplicité, laquelle fait acquiescer doucement le cœur aux commandemens et fait qu'on s'estime bien heureux d'obeir, mesme aux choses qui repugnent, et plus en celles-la qu'en nulle autre.

Ne desires rien que ce que Dieu veut. Faites ce que celuy qui vous a en charge dit, pourveu que vous n'y reconnoissies point de peché ; et par consequent, veuilles ce que veut vostre superieur, et vous voudres ce que Dieu veut: et vous voyla vrayement obeissante et contente.

Je prie Dieu qu'il vous octroye cette grace, de l'amour de la volonté de Dieu.