Lettre MMLXX. Compassion Surnaturelle du Saint pour les Souffrances de sa Fille. - les Holocaustes de l'Ancienne Loi et l'Écorchement du Cœur. - Dieu Nous Aime : Qu'importe le Reste ? - Jésus-Christ a Tout Souffert pour S'unir à son Épouse ; Que Doit Faire Celle-Ci pour Lui " Tesmoigner ses Amours Reciproques " et le Baiser ?

[1607-1609.]

( Ms de Nancy ) J'ay de la compassion, sans mentir, mays une compassion douce et souëfve, pour l'esperance que j'ay de voir vostre jeunesse renouvellee ( Ps 102,5 ) sous l'effort de ces afflictions interieures. Non, on n'offroit point d'holocauste en l'ancienne Loy qu'elle ne fust du tout escorchee ( Lev 1,6 ) : il faut que vostre cœur soit escorché tout vif, pour estre offert en holocauste vivant a nostre Dieu. Resignations, renoncement des consolations exterieures, des interieures, des corporelles, cordiales : que nous doit-il chaloir de tout cela, pourveu que Dieu [nous] ayme ? et il nous ayme, pendant que de la pointe de nostre cœur nous nous tenons a luy. Courage, ma Fille ! ce vent de tempeste nous conduira a bon port.

A Dieu, ma chere Fille ; a Dieu, dis-je, soyes-vous, et vous, et vostre cors, et vostre cœur, et vostre ame. Il a bien esté tout nostre : son cors en croix, son cœur en angoisse, son ame en tristesse, et tout ce qui estoit en luy ; il se contenta de tout souffrir pour adherer a son espouse ( Gn 2,24 ; Ep 5,31 ) . Mon Dieu, que souffrons-nous a l'esgal ? Oh ! que la rayson veut bien que l'espouse souffre quelque chose pour tesmoigner ses amours reciproques et adherer a son Espoux. Jesus Christ est sur la croix : qui le veut bayser, il faut gravir sur la croix et se piquer aux espines de sa couronne.

VIVE JESUS, VIVE MARIE ! Amen.

……………………………………………………………………………

A Dieu, ma chere Fille: la sacree Vierge nostre Dame soit a jamais nostre belle estoille, et son Filz nostre unique Soleil. Amen.