13. Oratio de laudibus sancti Thomae apostoli

Ve gloriose Thoma apostole, omni laude et honore dignissime. Ave illustrissime praedicator evangelicae veritatis, lux et decus ecclesiae universalis. Ave ferventissime amator Christi, cuius sanctissimum latus tangere meruisti. Ave lucidissime contemplator abyssalis veritatis, profundissime penetrator Trinitatis, certissime explorator glorificatae humanitatis. Ave solidissime confessor fidei, magnifice reparator fidei, validissime propulsator omnis dubietatis. Ave clarissime illuminator hominum, qui potentissimum Indiae regem signis ac doctrinis convertisti ad Dominum. Ave eximie patrator miraculorum mortuos suscitans, leprosos mundans, caecos illuminans, daemones fugans et omnem infirmitatem in Christi nomine curans. Ave sapientissime architector caelestis fabricae, qui pro terreno palatio parasti regi Indorum perpetuam mansionem in caelo. Ave purissime zelator castitatis, altissime laudator virginitatis, honestissime. conservator integritatis, devotissime venerator sacerdotalis dignitatis. Ave perfectissime contemptor divitiarum, largissime distributor eleemosynarum, benignissime srefector pauperum, sollemnissime aedificator ecclesiarum. Ave patientissime tolerator persecutionum, infatigabilis laborator pro salute animarum, fidelissime pastor credentium populorum. Ave fortissime athleta martyrum, debellator daemonum, extirpator errorum, destructor idolorum, victor tyrannorum flammas superans, incendia non sentiens, qui pro amore Christi gladio transfixus vitam gloriosa passione terminasti. Amen.