Lettre CCII. Au Prieur et aux Religieux du Monastère de Sixt

( INÉDITE)

Désir de connaître les résultats obtenus par la visite épiscopale. Assurance de dévouement.

Annecy, 14 novembre 1603

Messieurs mes Freres en Jesus Christ,

Je desire fort de sçavoir quelz effectz auront suivi les ordonnances faittes en nostre visite, tant de vostre costé que de celuy de monsieur l'Abbé. C'est pourquoy je vous prie de me faire ce bien de m'en donner advis entre cy et Noël, poinct par poinct, affin que si je doy contribuer quelque diligence a l'entiere execution d'icelles, je n'y manque par ignorance de la necessité.

Monsieur de Saint Paul me dit que monsieur l'Abbé avoit laissé d'accenser l'abbaye, selon qu'il m'avoit donné parolle, pour quelques parolles laschees de vostre part, qui estonnerent les fermiers qui s'offroyent. Si cela est, vous aures occasion d'en tenir quitte ledit sieur Abbé, puisque quant a moy, cela ne m'importe point, pourveu que vous soyes payés comme il faut, qui est mon seul regard pour ce particulier. Ce que vous manquant, si vous m'en donnes advertissement, je ne fera y aucune faute de m'essayer d'y remedier, honteux que je serois de faire des ordonnances aux visites des autres monasteres, ainsy que nostre Saint Pere et Son Altesse le veulent, si a la premiere j'avois esté du tout inutile.

Je me recommande a vos prieres desquelles, a la verité, j'ay bon besoin, et suis,

Messieurs,

Vostre tres humble confrere et serviteur en Jesus Christ,

FRANçs, E. de Geneve.

Annessi, ce quatorziesme novembre mil six centz et trois. A Messieurs les Prieur et Religieux de Sixt.

Revu sur le texte inséré dans le 1er Procès de Canonisation.