Lettre CCCV. À la Présidente Brulart

Nul repos qu'en Dieu. - Désir d'avoir des nouvelles de l'Abbesse du Puits d'Orbe ; légère inquiétude à son sujet. - Messages d'amitié pour diverses personnes .

Annecy, 28 août 1605.

Madame ma tres chere Seur,

Je vous escris volontier par ce porteur par ce qu'il m'est fort asseuré et que, dans peu de tems, il me rapportera de vos nouvelles, sil vous plait luy en donner. Que je les souhaite saintes, ma chere Dame, et sortables aux graces que Dieu vous a faites. Mais je ne doute nullement qu'elles ne soyent tous-jours telles, et qu'elles ne me donnent asseurance de quelque progres spirituel en l'amour de Dieu et de vostre vocation. Allons, ma chere Seur, ne nous arrestons nulle part qu'en Dieu, hors duquel aussi bien ne pouvons nous avoir aucun repos ( S.Aug Conf. 1,1 ). Ayes un grand cœur, et eslevé, qui sache conserver sa paix et sa tranquillité parmi toutes sortes d'orages.

Il y a long tems que je n'ay nulles nouvelles de nostre bonne seur, Madame du Puis d'Orbe. Cela m'ennuye, car elle m'est si chere que je ne me puis empescher de quelque petite inquietude, si je ne sçai souvent des nouvelles de l'estat de son ame et de ses bons desseins, mesmement a present que monsieur nostre pere mesme m'a escrit qu'il se traittoit a descouvert de la reformation de sa Mayson. Faites moy ce bien de m'en escrire quelque chose au retour de ce porteur, lequel peut estre ne sera pas si soudain qu'elle mesme ne puisse bien vous envoyer des lettres pour me faire tenir par son entremise.

Je n'escris point a monsieur Viardot ; il me suffira si vous prenes la peyne de le saluer en mon nom et le resouvenir de moy pour le tems de ses prieres, ausquelles je me recommande, et aux vostres aussi.

Le Sauveur du monde vive et regne a toute eternité dans nos cœurs, .Madame ma chere Seur, et je suis

Vostre frere et serviteur plus humble,

FRANÇs, E. de Geneve.

Jour saint Augustin, 28 aoust 1605. Je vous supplie de me ramentevoir es bonnes graces de monsieur vostre mari, auquel je suis serviteur tres humble, et de monsieur et madamoyselle de Jacot .

A Madame

Madame la Presidente Brulart.

Revu sur l'Autographe conservé au Couvent des Sœurs de Saint- Vincent de Paul de Poperinghe (Belgique).