Lettre CCCXVI. À la Baronne de Chantal

Amour du Saint pour les afflictions. - Il refuse de s'expliquer sur l'idée que la Baronne avait eue de quitter le monde. - Avec Dieu, il fait bon où que ce soit. - Ce qu'il n'est pas besoin de dire en confession.

Annecy, 13 octobre 1605. Ayant jusques icy esté detenu par un monde de cuisantes affaires, ma chere Fille, je m'en vay a cette benite visite, en laquelle je voy a chaque bout de champ des croix de toutes sortes. Ma chair fremit, mais mon cœur les adore. Ouy, je vous salue, vous, petites et grandes croix, spirituelles ou temporelles, exterieures ou interieures; je salue et bayse vostre pied, indigne de l'honneur de vostre ombre.

A quel propos cela ? Ouy, c'est a propos, ma si chere Fille, car j'adore de mesme affection les vostres, que je tiens pour miennes, et veux (au moins je vous en prie) que vous aymies les miennes de mesme cœur. J'en ay bien eu despuis nos Pardons , mays courtes et legeres. Mon Dieu, supportés la foiblesse de mes espaules et ne les chargés que de peu, pour seulement me faire connoistre quel pauvre soldat je serois, si je voyois les armees en front.

Que vos lettres m'ont consolé, ma chere Fille ! je les voy pleines de bons desirs, de courage et de resolution. Oh ! que voyla qui va bien. Et laissons gronder et fremir l'ennemy a la porte et tout autour de nous ; car Dieu est au milieu de nous ( Dt 7,11 ; 20,4 ), en nostre cœur, d'ou il ne bougera point, s'il luy plaist. Hé, demeurés avec nous, Seigneur, car il se fait nuit ( Lc 24,29 )

Je ne vous diray plus rien, ni dessus le grand abandonnement de toutes choses et de soy mesme pour Dieu, ni dessus la sortie de sa contree et de la mayson de ses parens ( Gn 12,7 ). Non, je n'en veux point parler ; Dieu nous veuille bien esclairer et faire voir son bon playsir, car, au peril de tout ce qui est en nous, nous le suivrons ou qu'il nous conduise ( Mt 8,19 ). Oh, qu'il fait bon avec luy, ou que ce soit ( Mt 17,4 ) !

Je pense a l'ame de mon tres bon et tres saint larron. Nostre Seigneur luy avoit dit qu'elle seroit ce jour la avec luy en Paradis ( Lc 23,43 ); et elle ne fut pas plus tost separee de son cors, que voyla qu'il la mena en enfer. Ouy, car elle devoit estre avec Nostre Seigneur, et Nostre Seigneur estoit devallé es enfers : elle y alla donques avec luy. Vray Dieu ! que devoit-elle penser en descendant et voyant ces abismes devant ses yeux interieurs ? Je croy qu'elle disoit avec Job ( Jb 14,13 ) : Qui me fera la grace, 0 mon Dieu, que tu me conserves et defendes en enfer ? Et avec David ( Ps 22,4 ) : Non, je ne craindray nul mal, car, Seigneur, tu es avec moy.

Non, ma chere Fille, pendant que nos resolutions vivent, je ne me trouble point. Que nous mourions, que tout renverse, il ne m'importe , pourveu que cela subsiste. Les nuitz nous sont des jours, quand Dieu est en nostre cœur, et les jours sont des nuitz, quand il n'y est point.

Pour nos filles , vous ne sçauries faillir a suivre l'advis de vostre confesseur . Il n'est pas besoin de dire en confession ces petites pensees, qui, comme mousches, passent et viennent devant vos yeux, ni l'affadissement des goustz que vous aves eu en vos vœux, car tout cela ne sont point pechés, mais ennuis, mais incommodités.

Pressé donq, je ferme cette lettre. Je prie Nostre Seigneur qu'il vous rende de plus en plus sienne ; qu'il soit le protecteur de vos resolutions, le defenseur de vostre viduité, le directeur de vostre obeissance ; qu'il soit vostre tout et tout vostre. Je prie cette sainte Abbesse, nostre chere Dame et Reyne, qu'elle nous soit a jamais propice, et nous face mourir et vivre en son Filz.

Je suis incomparablement, ma chere Fille, je suis tout vostre, es entrailles du Filz et de la Mere.

F.E. de Geneve.

Le ... octobre 1605.