Lettre CCCVII. À Madame de Limojon

Exhortation à poursuivre la vraie dévotion. - Dieu " est bon a tous et en tous tems. " - Aspirer perpétuellement à lui .

Annecy, 7 septembre 1605.

Madame,

J'ay soudainement despeché vostre homme, et par ce que je doy prescher a midi , je ne vous diray sinon que je suis tous-jours fort consolé, quand j'ay de vos lettres, et le dois bien estre encor plus par celle ci qui m'asseure si asseurement que vostre cœur est ferme au dessain quil a fait de servir son Dieu a la poursuite de la vraye devotion ( cf lettre 291 ).

Continues, ma chere Dame, continues, dis-je, a vous avancer joyeusement de ce costé-là, ou vous rencontreres en fin le bienheureux repos de vostr'ame. Souvenés vous que nostre Dieu n'est pas comme le reste des choses : il est bon a tous et en tous tems, vous le treuveres par tout a vostre support et consolation ; c'est pourquoy ne vous lasses point a la queste d'un si grand bien. Aspires y perpetuellement par les courtz mais vifz eslancemens de vostre esprit a son saint amour, desquelz je vous ay souvent parlé.

Je vous remercie de la souvenance que vous aves devant Nostre Seigneur de ma misere pour la recommander a sa misericorde. Faites-le tous-jours, je vous prie, et saches que je n'offre jamais le Filz celeste au Pere sur l'autel, que je n'offre quant et quant vostre cœur a sa divine Majesté, affin qu'elle la (sic) benisse de ses plus cheres benedictions. Et ne vous puis oublier pour ce regard, nom plus que moymesme, qui, saluant mille fois monsieur vostre mari et vos bonnes graces, suis sans fin

Vostre serviteur tres affectionné en Nostre Seigneur,

FRANçs, E. de Geneve.

VII septembre. A Madame

Madame de Limogeon.

Revu sur l'Autographe appartenant à M. le chanoine Dominjet, à Chambéry.