Lettre DCXXXVIII. À la Mère de Chantal

Pourquoi ne pas se tourmenter des fâcheuses pensées qui sont autour. du cœur. A quelle condition rien ne nous offensera.

Annecy, [8 décembre 1610 ]

En fin ce beau jour, si propre pour aller vers vous, ma tres chere Fille, s'escoule ainsy sans que j'aye ce contentement; au moins faut que je supplee en quelque sorte par ce petit mot, que je sauve d'entre les affaires que certains Religieux m'apportent.

Bonsoir donq, ma tres chere Fille. Ayés bien soin de soulager doucement vostre pauvre cœur ; gardés-vous bien de luy sçavoir mauvais gré de ces fascheuses pensees qui luy sont autour. Non, ma Fille, car le pauvret n'en peut mais, et Dieu mesme ne luy en sçait aucun mauvais gré pour cela ; au contraire, sa divine sagesse se plaist a voir que ce petit cœur va tremblotant a l'ombre du mal, comme un faible petit poussin a l'ombre du milan qui va voltigeant au dessus de luy (S.Aug Conf 12,27) ; car c'est signe qu'il est bon, ce cœur, et qu'il abhorre les mauvaises fantasies.

Mais, ma tres chere Fille, nous avons nostre Mere, sous les aisles de laquelle nous faut fourrer. Recourons a la Croix, et l'embrassons de cœur ; demeurons en paix a l'ombre de ce saint arbre. Mon Dieu ! il est impossible que rien nous offense, tandis qu'avec une vraye resolution nous voulons estre tout a Dieu ; et neanmoins nous sçavons bien que nous le voulons.

Bon soir de rechef, ma tres chere Fille; ne vous inquietés point, mocqués-vous de l'ennemy, car vous estes entre les bras du Tout Puissant. Dieu soit a jamais nostre force et nostre amour ! Demain, moyennant sa grace, nous vous irons voir, ma tres cherement unique Fille de mon cœur.