Lettre DCXLV. À la Mère de Chantal

Tableau de la Nativité. - Où se trouvaient en la nuit de Noël, les bons Anges des deux Saints. - Les pasteurs et la mélodie sacrée qu'ils entendent durant leur sommeil. - Le cadeau du Bienheureux au " petit Roy. "

Annecy, 25 décembre [1610 ]

Hé, vray Jesus ! que cette nuit est douce, ma tres chere Fille ! " Les cieux, " chante l'Eglise, " distillent de toutes pars le miel ; " et moy je pense que ces divins Anges qui resonnent en l'air leur admirable cantique, viennent pour recueillir ce miel celeste sur les lys ou il se treuve, sur la poitrine de la tres douce Vierge et de saint Joseph. J'ay peur, ma chere Fille, que ces divins Espritz ne se mesprennent entre le lait qui sort des mammelles virginales, et le miel du Ciel qui est abouché sur ces mammelles. Quelle douceur de voir le miel succer le lait (Ct 4,11) !

Mais je vous prie, ma chere Fille, ne suis-je pas si ambitieux que de penser que nos bons Anges de vous et de moy se treuverent en la chere trouppe des musiciens celestes qui chanterent en cette nuit ? 0 Dieu, s'il leur playsoit d'entonner derechef aux oreilles de nostre cœur cette mesme celeste chanson, quelle joye, quelle jubilation ! Je les en supplie, affin que gloire soit au ciel, et en terre paix aux cœurs de bonne volonté (Lc 2,14).

Revenant donq d'entre les sacrés mysteres, je donne ainsy le bon jour a ma chere Fille ; car je croy que les pasteurs encor, apres avoir adoré le celeste Poupon que le Ciel mesme leur avoit annoncé (Lc 2,8), se reposerent un peu. Mais, 0 Dieu, que de suavités, comme je pense, a leur sommeil ! Il leur estoit advis qu'ilz oyoyent tous-jours la sacree melodie des Anges qui les avoyent salués si excellemment de leur cantique, et qu'ilz voyoyent tousjours le cher Enfant et la Mere qu'ilz avoyent visité.

Que donnerions-nous a nostre petit Roy que nous n'ayons receu de luy (1 Co 4,7) et de sa divine liberalité ? Or sus, je luy donneray donques a la sainte grand' Messe la tres uniquement fille bienaymee qu'il m'a donnee. Hé, Sauveur de nos ames, rendés-la toute d'or en charité, toute de myrrhe en mortification, toute d'encens en orayson, et puis recevés-la entre les bras de vostre sainte protection, et que vostre cœur die au sien : Je suis ton salut (Ps 34,3) aux siecles des siecles. Amenr.

Vostre tres affectionné pere et serviteur,

FRANÇs, E. de Geneve.