Lettre DCCXXX. Au Marquis de Lans

L'Evêque de Genève expose au gouverneur le sujet et les résultats de son voyage à Gex. - Les commissaires, l'un " grand catholique, " et l'autre " grand heretique. " - Exécution de l'édit de Nantes à Gex. - Espérances fondées pour le prochain rétablissement du culte.

Annecy, 13 décembre 1611.

Monsieur,

Comme je donnay advis a Vostre Excellence de mon acheminement a Gex ( lettre 727 ), je le luy donne aussi de mon retour que j'ay fait si tost qu'il m'a esté possible. Le sujet de mon voyage fut que les huguenotz ayant dressé des plaintes en leur assemblee de Saumeur sur l'inexecution de l'Edit de Nantes , le Roy de France, en son Conseil, a deputé des commissaires en toutes les provinees pour rendre par tout ledit Edit executé. Et pour la Bourgoigne, sous laquelle on comprend les païs eschangés, on commit le sieur de Mazuyer , vicomte d'Ambrieur, maistre des requestes, grand catholique et grand homme d'affaires, et le sieur de Vilarnos , beaufilz du sieur du Plessis Mornay , qui a la survivance de son beaupere au gouvernement de Saumeur, grand heretique, et au reste ,

gentilhomme de bonne sorte et bien qualifié..

L'un et l'autre estans arrivés a Gex, il fut proposé de venir aux effectz de leur commission, et par consequent, de me remettre toutes les eglises et tous les biens ecc1esiastiques possedés par les huguenotz, affin d'estre par moy pourveu en chasque lieu de pasteurs et services convenables. Mays parce que je n'estois pas la, la proposition se fit en mon nom par un tres bon et digne Pere Capucin, originaire de Beugey, mays natif de Chamberi , qui neanmoins n'ayant point de procuration, promit de me faire ratifier.

Sur cela, estant adverti et conjuré par les Catholiques de me rendre en praesence pour un coup de si grande importance, j'y allay nuit et jour, et me treuvay asses tost pour une assemblee generale de tout ce païs-la , ou je refis a vive voix mes requisitions et m'essayay de respondre aux allegations des ministres, qui n'ont rien oublié de leur costé pour empescher le fruit de cette commission demandee imprudemment par leurs confreres, qui ne prirent pas garde que, si ailleurs l'execution de l'Edit leur estoit favorable, a Gex elle leur estoit extremement contraire. Et en fin, apres trois ou quatre assemblees ainsy generales et publiques, la multitude des oppositions et allegations de nos adversayres fut cause que le tout a esté renvoyé au Conseil privé, pour estre par iceluy ordonné selon qu'il verra a faire; sauf pour le regard de l'eglise des Carmes de Gex, toute ruinee , et une chapelle jointe a icelle, fondee par un bastard de la mayson de nos Princes , comme encor de l'eglise d'Alemoigne , qui, sur le champ, m'ont esté remises. J'espere neanmoins que dans bien peu de moys on.me remettra tout le reste, ayant tant de rayson comme j'ay de mon costé; si bien que ce voyage n'aura pas esté infructueux.

Rien autre ne s'est passé, digne d'estre representé a Vostre Excellence, laquelle je supplie de m'honnorer tous-jours de sa bienveüi11ance, et de croire que de tout mon cœur je suis,

Monsieur,

Vostre tres humble serviteur,

FRANÇs, E. de Geneve.

XIII decembre 1611, a Neci.

A Son Excellence.

A Chamberi.