Lettre DCCCXLVI. À la Mère de Chantal

Le cœur de l'Evêque de Genève, - Un projet de .Congrégation. - Le Traitté de l'Amour de Dieu. - Nouvelle de la mort tragique du baron de Lux : compassion du Saint.

Annecy, vers le 10 janvier 1613

Ma tres chere Mere, ma Fille,

Je vous veux un peu donner le bon jour pour contenter mon cœur partout ; car encor le faut-il aymer, ce pauvre cœur, puisque, tout infirme quil est, il veut aymer son Dieu de toute l'estendue de ses forces, en sincerité et pureté.

Or je desire, mais je n'ose me promettre que je vous aille voir aujourdhuy. Entr'autres causes de ma defiance, c'est que voyci arriver M. l'Aumosnier de Belleville , qui est celuy qui m'a escrit pour Mme des Gouffier ,

et la rayson veut, que venant expres pour me voir, je luy en donne le plus de commodité que je pourray. Je croy quil vous ira voir aussi, et je desire que ce soit a sa consolation et edification, mesme quil a quelque sorte d'inclination a vouloir estre de nostre future Congregation, si Dieu nous fait la grace que nous l'erigions , Il voudra aussi peut estre voir nostre fille Bellod , par ce quil est beaufrere de M. l'esleu Bellod .

J'ay des-ja travaillé deux heures en l'Amour de Dieu. Mays faut il pas que je vous die le desplaysir que j'eu hier de la nouvelle de la mort de nostre monsieur le baron de Lux, tué, comme l'on dit, d'un coup de pistolet par le chevalier de Guyse . La nouvelle est un peu suspecte pour venir de Geneve ; neanmoins, ainsy comme on l'asseure, j'ay grande opinion qu'elle soit veritable. Helas ! que je le plains sil est mort ainsy, car autrement, la mort est trop commune et trop necessaire pour s'en estonner extraordinairement.

Ma tres chere Fille, ma tres bonne Mere, Dieu vous comble de ses plus sacrees benedictions en tout vostre cœur, en toute vostre vie. Ne me respondes que ce soir, mais dites a M. Michel comme vous vous portes.

Vive Jesus!

Revu sur l'Autographe appartenant au R. P. Houet, supérieur de l'Oratoire de Rennes.