Lettre DCCCLXII. À M. Antoine des Hayes

Détails rétrospectifs sur l'affaire Berthelot et l'internement de M. de Charmoisy. - Conseils adressés à Philothée par l'entremise du destinataire. Le Saint désirerait avoir la liberté d'aller à Paris l'année suivante.

Annecy, 28 mars 1613.

Monsieur,

Vous verrés, je m'asseure, par la lettre que monsieur de Charmoysi vous escrit, comme des le despart de madame de Charmoysi il a receu le desplaysir de se voir comme banni de cette ville, par un expres commandement que Son Altesse luy a fait de s'en retirer et ne plus y revenir, sur l'impression la plus fause du monde que Monseigneur de Nemours a receu de la part de quelques calomniateurs, que les bastonnades donnees au sieur Berthelot avoyent esté conseillees par monsieur de Charmoysi ; dont mon dit Seigneur de Nemours a entrepris le ressentiment si chaudement, que nous en sommes tous estonnés. Et peu s'en est fally que l'un de mes freres, chevalier de Malte , n'a esté ordonné à. la prison (bien que tout le tems de la querelle il fut avec moy a Sales), seulement par ce quil est grand ami du sieur Abbé de Talloyres et qu'il l'avoit fort visité apres les bastonnades. Or neanmoins, j'espere que dans peu de jours tout cela se passera, et Monseigneur de Nemours, selon sa bonté, sera marri d'avoir fait faire du mal a monsieur de Charmoysi et d'en avoir desiré a tant d'autres ses plus fideles et affectionnés serviteurs et sujetz .

Mays ce pendant, il faut que madame de Charmoysi tienne bonne contenance et ne face nulle sorte de plaintes qui puissent venir a la connoissance de monsieur de Jacob , ains que luy parlant, elle tesmoigne une grande asseurance que la bonté de Son Altesse et de Monseigneur de Nemours regardera bien tost favorablement son mari et sera offencee contre ceux qui luy ont voulu procurer du mal. Ce que je vous dis, Monsieur, par ce que vous pourres mieux dire a cette bonne dame comm'elle se devra comporter que je ne sçaurois le luy escrire, bien que je luy en touche un mot.

Enfin, tout nostre Caresme s'est passé en cette pauvre petite ville a nous defendre presque tous des calomnies qu'on jettoit indifferemment sur le tiers et le quart, a rayson de ces miserables bastonnades. Eusse-je pas esté mieux si mon bonheur eut permis l'effect de vostre volonté, et que j'eusse presché en vostre chaire ( Note 491)

et jouy de la douceur de vostre conversation et de la presence de Monsieur nostre Evesque qui est là ? J'espere, dans le moys, partir pour Thurin , ou je feray tout ce qui me sera possible affin d'avoir ma liberté pour l'annee suivante ; car le desir du bien que j'attens de vostre veûe et du rencontre de tant de gens d'honneur qui, pour vostre consideration, me recevront en leur conversation, est extreme dedans mon cœur. La volonté neanmoins de Dieu en soit faite, et luy playse vous combler de toute santé et vraye felicité, avec madame vostre chere digne compaigne et toute vostre mayson.

C'est le souhait perpetuel, Monsieur, de

Vostre tres humble, tres affectionné serviteur,

FRANÇs, E. de Geneve.

28 mars 1613. a Neci

Monsieur, j'escris en sursaut, c'est pourquoy je ne vous envoye pas les papiers du conte fait entre mes freres et les agens de madame la Duchesse de Mercœur , comme je feray bien tost, puisque vostre bonté s'estend a vouloir en recevoir la peyne.

Monsieur

[Monsieur des] Hayes,

Maistre d'hostel du Roy,

Gouverneur et Baillif de Montargis.

Revu sur l'Autographe conservé au 1er Monastère de la Visitation de Rouen.