Lettre DCCCLXVII. Au Comte Prosper-Marc de Tournon

Dévouement du Saint pour M. de Charmoisy. - Malice de ses ennemis et crédulité du prince de Nemours. - Berthelot et M. de Servette.

Annecy, 11 avril 1613.

Monsieur,

J'escris a part ce billet pour laisser l'autre lettre en estat de pouvoir estre monstree a monsieur le marquis de Lans ; et si je ne l'avois escritte si praecipitamment, j'eusse voulu quil l'eut envoyee ou a monsieur le Chancelier , ou a quelqu'un qui eut entrepris de bien representer a Son Altesse la malice et le venin des ennemis de nostre pauvre parent , qui est la, mussé comme un lievre dans Marcla , avec une fort exacte obeissance. Chacun est scandalisé du grand pouvoir que les accusations seules ont : sil suffit d'accuser, qui sera innocent ? Ceux qui connoissent M. de Servette , et je croy que Son Excellence le connoist, sçauront bien discerner de l'action d'hier. Certes, Bertelot n'avoit que faire de s'opposer a luy en la conduite des dames ; car, comme vous sçaves, c'est un gentilhomme de si bon lieu, que, comme que ce soit, encor le faut-il respecter.

Or, il suffit si l'on peut faire l'office au pauvre parent des-ja banni du Genevois et serré dans une mayson seule. Pour moy, je voy tant de malice et de ruse en ses calomniateurs, et la voy si clairement, que je me sens obligé de parler et me semble que le silence seroit peché. L'importance est que l'office se face viste, car je m'asseure que ce matin, Berthelot despechera un homme, comme sachant bien que la plus grande force de sa ruse consiste en la diligence.

Si madame la Comtesse nous envoye des bouteilles, on les emplira tant quil y aura du piqu'ardent ( note 652) , et si nous eussions eü des ampolons a suffisance, nous n'eussions pas oublié de vous envoyer vostre part. Je feray tenir seurement la lettre au cousin lundi ou mardi, au fin plus tard.

J'espere avoir le bien de vous saluer et redire que je suis, Monsieur,

Vostre plus humble, tres affectionné serviteur,

FRANÇs, E. de Geneve.

XI avril 1613.

A Monsieur

Monsieur le Comte de Tornon.

Revu sur l'Autographe appartenant à Mme la marquise Pensa, à Turin.