Lettre MCDXVII. Au Duc Roger de Bellegarde

(INÉDITE)

Un converti fugitif qu'il faut accueillir favorablement. - L'audace des hérétiques et le remède à y opposer.

Annecy, 25 avril 1618.

Monsieur,

Ce porteur, jeun'homme de Gex , quitte son pais et la mayson de son pere pour eviter les inhumaines et continuelles persecutions qu'il y a rencontrees des qu'abjurant l'hceresie il a embrassé la foy catholique; et c'est un grand cas, Monsieur, que cette faction de prcetendus reformés, toleree par l'indulgence du Roy, est si insolente que de vouloir, par des voyes extraordinaires, empescher aux sujets de la coronne la liberté de servir Dieu selon la religion du Roy et du royaume, en laquelle l'Estat a esté et laquelle a tous-jours esté en l'Estat, il y a, graces a Dieu, environ douze cens ans.

Monsieur, c'est pour cela que je vous ay supplié de nous faire avoir des magistratz catholiques en ce balliage de Gex , qui, par l'authorité qu'ilz possederont, pourront donner le contrepoids a la multitude et malice des ennemis de la religion du Roy et du royaume, qui sont si hardis au mal et si pleins d'artifices pour l'executer que, s'ilz ne sont retenus de main forte, ilz ne cesseront d'empescher par toutes sortes de moyens violens le progres de la conversion des ames. Cependant, le favorable accueil et les graces qu'il plaira a Vostre Grandeur de faire a ce jeun'homme qui recourt a vostre bonté, Monsieur, comme a son asyle, serviront de promesse a ceux qui sont si heureux d'estre appellés a la conversion, d'estre protegés envers ceux qui les voudroyent travailler et vexer pour ce sujet.

Au reste, Monsieur, c'est meshuy chose superflue de repeter les vœux de mon service, que j'ay fait a Vostre Grandeur, puisque lhonneur que j'ay de vous oser regarder et considerer comm'un pere tres affectionné fait son tres aymable filz, met hors de doute le parfait respect et infini amour que mon ame a pour la vostre, que je supplie incessamment Nostre Seigneur de vouloir combler de sa grace, et demeure invariablement,

Monsieur,

Vostre tres humble et tres obeissant serviteur,

FRANÇs, E. de Geneve.

25 avril 1618, Annessi.

Revu sur l'Autographe conservé à Tours, chez les Religieuses du Saint-Esprit.