Lettre MCDIII. À la Mère Favre Supérieure de la Visitation de Lyon

Les mères poules et leurs poussins, - Une école de charité et de patience. - Conseils au sujet de Novices. - Le filet imperceptible de la Providence. - Parure de ce monde et parure du Ciel pour les épouses du Christ. Humilité du saint Evêque.

Annecy, 19 février 1618.

Je vous voy, ma tres chere Fille, toute malade et dolente sur les maladies et douleurs de vos filles . On ne peut estre Mere sans peyne. Qui est celuy qui est malade, dit l'Apostre ( 2 Co 11,29 ),

que je ne le sois avec luy ? Et nos anciens Peres ( Jn Chrys. Hom 47 in Mt ; S.Aug Enarrat in Ps 58,10 ; Beda Enarrat in Mt ) ont dit la dessus, que les poules sont tous-jours affligees de travail tandis qu'elles conduisent leurs poussins et que c'est ce qui les fait glosser continuellement, et que l'Apostre estoit comme cela. Ma tres chere Fille, qui estes aussi ma grande fille, le mesme Apostre disoit aussi, que quand il estoit infirme, alhors il estoit fort ( 2 Co 12,10 ), la vertu de Dieu paroissant parfaite en l'infirmité

( 2 Co 12,9 ). Et vous donq, ma Fille, soyes bien forte parmi les afflictions de vostre Mayson. Ces maladies longues sont des bonnes escholes de charité pour ceux qui y assistent, et d'amoureuse patience pour ceux qui les ont ; car les uns sont au pied de la croix avec Nostre Dame et saint Jean, dont ilz imitent la compassion, et les autres sont sur la croix avec Nostre Seigneur, duquel ilz imitent la Passion.

Quant a la Seur de laquelle vous m'escrives, Dieu vous fera prendre le conseil convenable. Cette douceur es souffrances est un pronostic de la future faveur abondante de Nostre Seigneur en cette ame, ou qu'elle aille ou demeure . Salués, je vous supplie, ces deux filles tendrement de ma part, car je les ayme ainsy.

Au demeurant, s'il est treuvé convenable de renvoyer cette Novice, il le faudra faire avec toute la charité possible, et Dieu reduira tout a sa gloire. Dieu garde et benit les sorties aussi bien que les entrees ( Ps 120 ) de celles qui font toutes choses pour luy, et qui n'occasionnent pas leurs sorties par leurs mauvais deportemens. Sa providence fait vouloir le sacrifice qu'elle empesche par apres d'estre fait, comme on voit en Abraham ( Gn 22,10 ); et me semble que je dis je ne sçay quoy de ceci au livre de l'Amour de Dieu,

mais je ne me souviens pas ou ( TAD 9,6 ).

Dilatés cependant vostre cœur, ma chere Fille, mon ame, parmi les tribulations; aggrandisses vostre courage, et voyes le grand Sauveur penché du haut du Ciel vers vous, qui regarde comme vous marches en ces tourmentes, et, par un filet de sa providence imperceptible, tient vostre cœur et le balance en sorte qu'a jamais il le veut retenir a soy.

O ma tres chere Fille, vous estes espouse non pas encor de Jesus Christ glorifié, mais de Jesus Christ crucifié : c'est pourquoy les bagues, les carquans et enseignes qu'il vous donne et dont il vous veut parer sont des croix, des clouz, des espines, et le festin de ses noces est de fiel, d'hyssope, de vinaigre ( Mt 27, 34 ; Jn 19,29 ). La haut nous aurons les rubis, les diamans, les esmeraudes ( Ap 21,19 ), le moust, la manne ( Ap 2,17 ) et le miel. Je ne dis pas ceci, non, ma chere grande Fille, vous tenant pour descouragee, mais vous tenant pour adoloree, et m'estant advis que je dois mesler mes souspirs avec les vostres, comme je sens mon ame meslee avec la vostre.

Voyes vous, ne me dites point que vous abuses de ma bonté a m'escrire des grandes lettres ; car en verité, je les ayme tous-jours suavement.

Ce bon Pere dit que je suis une fleur et un vase de fleurs, et un phœnix ; mais en verité, je ne suis qu'un puant homme, un corbeau, un fumier. Mais pourtant, aymés moy bien, ma tres chere Fille, car Dieu ne laisse pas de m'aymer et de me donner des extraordinaires desirs de le servir et aymer purement et saintement. En somme, apres tout, nous sommes trop heureux d'avoir pretention en l'eternité de la gloire, par le merite de la Passion de Nostre Seigneur, qui fait trophee de nostre misere pour la convertir en sa misericorde, a laquelle soit honneur et gloire es siecles des siecles. Amen.

Je suis vostre, ma tres chere Fille, vous le sçaves bien, mais je dis vostre d'une façon incomparable.

FRANçs, E. de Geneve.

Le 19 febvrier 1618.