Lettre MCDXLVIII. Au Chanoine Jean-François d'Ulme

Contradictions suscitées à la Visitation. - Le vaisseau " prest a singler et a faire voyle. " - Pourquoi les Sœurs de Grenoble sont heureuses. - Fleurs de suavité.

Annecy, vers le 18 ou le 19 juillet 1618 .

Monsieur,

Je ne m'estonne point de l'empressement que ces bons personnages ont a destourner les ames que Dieu appelle a la Visitation ( note 369 ) ; car encor me semble-il que cette bienaymee petite Congregation est quitte a bon marché des persecutions et contradictions que l'ennemi de son progres luy suscite et a accoustumé de susciter en toute pareille occasion. Certes, je croy pourtant qu'il n'en peut plus, car, comme un plaideur qui a mauvaise cause, il ne sçait plus que faire, sinon caler et prendre des delais.

J'ay receu de Rome commission d'eriger cette Congregation en tiltre de Religion, avec tous les privileges, preeminences, immunités et graces qu'ont toutes les autres Religions, et ce, sous la Regle de saint Augustin Dites a cette bonne ame qu'elle entre asseurement a Sainte Marie ; bien qu'elle ne soit pas encor Religion, elle le sera bien tost, et j'oserois dire que, devant Dieu, elle l'a tous-jours esté, puisque, par sa grace, l'on y a tous-jours vescu religieusement. Certes, asses entre sur la mer qui entre dans un vaysseau qui est a l'emboucheure du Rosne, prest a singler et faire voyle.

Nostre Mere ira cet hiver faire une Mayson a Paris , et, comme je prevoy, avec tant de bonheur, d'advantage, de protection et d'assistance, qu'apres cela je m'asseure que tout demeurera calme et en paix.

J'estime nos Seurs de vostre ville trop heureuses de jouir, comme elles font, des effectz de vostre charité, soin et affection. O quelle suavité a mon chetif cœur paternel, de sçavoir que mon frere tres aymable est tout charitablement cordial a mes Filles bienaymees ! Je vous en fay mille tres humbles actions de graces, Monsieur mon tres cher Frere, et vous proteste que, recevant vostre lettre, il me semblait cueillir des fleurs de suavité incomparable sur le coupeau d'une de nos montaignes, ou j'estais alhors . C'estoit en l'octave de nostre grand saint Jean, ou, me souvenant que l'Evangeliste de nostre Princesse ( Lc 1,15 ) dit de luy : Et vinum et siceram non bibet , j'admiray la douceur de Dieu, de m'abreuver, moy chetif homme, du vin de la charité que le Saint Esprit a respandu en nos cœurs

( Rm 5,5).

Vivons ainsy, mon tres cher Frere, et croyes que, tant que je vivray, je porteray la qualité de

Vostre tres obeissant frere et serviteur,

tout inutile et tout affectionné,

FRANçs, E. de Geneve.