Lettre MCDLX. À M. Jean Carron

(INÉDITE)

Premier témoignage d'honneur et d'estime, - L'insuccès des démarches et la vanité des promesses faites en faveur des curés d'Armay et de Draillant. Triste état de leurs paroisses. - Financiers à court d'argent. - Moyen proposé par le Saint pour remédier au mal.

Annecy, 25 août 1618 .

Monsieur,

Je ne vous rendis onques aucun tesmoignage de l'honneur que je vous porte, ni de l'estime que je fay de vostre amitié ; mais la faveur que vous m'aves faite de m'asseurer de vostre assistance es occasions, me promet que vous me la departires au sujet qui s'en presente.

Quand Monseigneur le Serenissime Prince estoit icy il y a deux ans ( note 36 ), je luy representay la justice de la demande des curés d'Armoy et de Draillens, selon la requeste ci jointe ; et Son Altesse commanda, et par escrit et de bouche, quïlz fussent payés, en consideration de ce que leur payement estoit de droit divin et humain.

Despuis, sadite Altesse l'a de rechef commandé par lettres fort expresses, que vous, Monsieur, escrivites environ les festes de Pasques a monsieur le Marquis de Lans ( note 468 ), auquel je les rendis moy mesme ; et ne se peut dire de quelle asseurance il me promit que j'en verrois les effectz. .Mays pour tout cela, non plus que pour trente pareilles promesses, rien ne se fait, ains finalement Son Excellence a declaré qu'il n'y avoit pas moyen ; qui me fait de rechef hurter a la providence de sadite Altesse ( lettre précédente ). Et si elle sçavoit la necessité qu'il y a que ce payement se fasse, je m'asseure qu'elle le presseroit grandement ; car, Monsieur, il n'y a rien en ces parroisses (je dis rien pour tout) pour l'entretenement du service de Dieu et des ames, Son Altesse ayant voulu d'authorité souveraine, contre les arrestz du Senat, que tout le revenu que l'Eglise y possedoit fut relasché a ceux de Geneve, assignant seulement a chaque curé cinquante escus pour son entretien . Et il n'y a moyen d'en rien avoir, ains faut qu'ilz despensent beaucoup par empruntz, pour solliciter inutilement ce qui est deu si justement.

Or, si Son Altesse nous renvoye aux tresoriers, gabelliers, financiers, nous n'en aurons jamais chose du monde, car ilz se treuvent tous-jours courtz d'argent pour nous. Nous la supplions donq d'assigner nostre payement sur les tailles ordinaires des mesmes parroisses, avec commandement a la Chambre de faire descharger les païsans d'autant, et jusques a la concurrence de ce qui nous est deu. Et les parroisses en seront soulagees, car elles payeront plus a commodité, et les curés asseurés, tant de ce qui leur est deu et qu'ilz doivent reciproquement ailleurs ou ilz ont emprunté, que de ce qui leur doit ci apres estre payé pour leurs pensions.

Mais encor, s'il n'y a de bonnes clausules derogatoires, courrions nous fortune de n'avoir rien, tant sommes nous favorisés en nos poursuites, pour justes qu'elles soyent ! Ce que je dis, non pour me plaindre de la Chambre, qui est certes marrie de nous voir maltraitter non obstant les arrestz qu'elle a rendus pour nous contre les gabelliers, mais pour vous supplier, Monsieur, de ne rien oublier es depesches, affin que nous vous soyons, et ces curés et moy, de plus en plus obligés . Comme, me promettant vostre assistance, je me confesse des maintenant estre et vouloir estre toute ma vie, pour me dire et tenir,

Monsieur,

Vostre plus humble et tres affectionné serviteur,

FRANçs, E. de Geneve.

25 aoust 1618, Annessi.

Monsieur, je n'ay pas creu de devoir importuner monsieur Boschiz par une lettre en cette occasion, estimant de devoir en cela espargner son loysir et me contenter de le supplier, par vostre entremise, de [me] tenir pour son tres obligé serviteur, qui se promet sa faveur et en cette occurrence et es autres, pour sa. bonté. Revu sur une ancienne copie conservée à la Visitation de Turin.