Lettre MDCCLXVIII. À Madame de Toulongeon

Espoir d'une visite qui fit retarder une lettre. - Compliments affectueux à la destinataire au sujet de son mariage et de sa prochaine maternité. - A quelle fin Dieu nous donne ses faveurs. - Souvenir des bonnes résolutions prises autrefois. - Assurance de prières.

Lyon, 24 mars 1621 .

Madame,

L'esperance que j'ay tous-jours eu des une annee en ça d'aller en France, m'a retenu de vous ramentevoir mon inviolable affection a vostre service par lettre, puisque je croyais que quelque heureux rencontre me donnerait le moyen de vous rendre ce devoir en presence. Mais maintenant que je n'espere presque plus ce bien et que ce digne porteur me donne une commodité si asseuree, je me res-jouis de tout mon cœur avec vous, ma tres chere Fille (car ce mot est plus cordial), je me res-jouis et loüe Nostre Seigneur de vostre si estimable et aymable mariage, qui vous servira de fondement pour bastir et eslever en vous une douce et aggreable vie en ce monde, et pour heureusement passer cette mortalité en la tressainte crainte de Dieu, en laquelle, par sa grace, vous aves esté nourrie des vostre berceau ; car tout le monde me dit que monsieur vostre mary est un des plus sages et accomplis cavaliers de France , et que vostre liayson est non seulement noüee de la sainte amitié qui la doit serrer de plus en plus, mais aussi des-ja benite de la fertilité, par laquelle vous estes a la veille de vos couches, ainsy que [nostre Mere] m'asseure .

Il faut donq bien correspondre a toutes les faveurs du Ciel, ma tres chere Fille, car elles vous sont sans doute donnees affin que vous les facies proffiter a la gloire de Celuy qui vous gratifie, et a vostre salut. Je ne puis que je ne croye, ma tres chere Fille, que vous n'employies vostre courage a cela et que vous ne le facies, comme sachant que le bonheur de vostre mayson et de vostre personne depend de cela en cette vie passagere, et l'asseurance de l'immortelle apres celle cy.

Or sus, en ce nouvel estat de mariage auquel vous estes, renouvelles souvent les resolutions que nous avons si souvent faites de vivre saintement et vertueusement, de quelle condition que Dieu nous fist estre. Et si vous l'aves aggreable, continues a me favoriser de vostre bienveuillance filiale, comme je vous asseure, ma tres chere Fille, que d'un cœur tout rempli d'affection paternelle, je ne celebre jamais la tressainte Messe que tres particulierement je ne vous recommande a Dieu, avec monsieur vostre mary, auquel je suis et seray tous-jours, ainsy que je suis pour vous,

Madame,

Vostre tres humble et tres affectionné serviteur,

FRANçs, E. de Geneve.

La veille de Nostre Dame, a Lion.