Lettre MDCCLXXIV. À M. Antoine Quartery
Actions de grâces pour des témoignages de bienveillance. - Comment l'Evêque de Genève veut contribuer à la récompense de nombreuses bonnes œuvres faites par le destinataire. - Il lui en propose une nouvelle : l'établissement des Pères Capucins à Sion.
Annecy, 21 avril 1621.
Monsieur,
En cette occasion du voyage que le R. P. Dominique, Provincial, et le R. P. Philibert , de l'Ordre des Capucins, font en vos contrees de Valey, je me sens obligé de vous remercier du favorable tesmoignage que vous rendites a Romme pour mon frere Monsieur l'Evesque de Calcedoine, qui est a present mon coadjuteur, lequel, s'il estoit icy presentement, vous eut aussi escrit luy mesme .
Mays ce n'est pas la seule preuve que j'ay eüe de vostre bienveuillance en mon endroit, y ayant si long tems que vous m'aymes et que j'ay este obligé a vous honnorer pour la pieté et probité, jointes au zele et a la prudence dont Dieu vous a doüe, me resouvenant fort bien de ce que vous aves fait pour le service de l'Eglise et le bien de vostre païs en toutes les occurrences. Et de mon costé, pour contribuer ce que je puis a vostre recompense pour tant de bonnes œuvres ausquelles vous aves ci devant cooperé, je prie Dieu qu'il vous face la grace de continuer de plus en plus, croissant incessamment en vertu et devotion, affin qu'apres une longue et utile vie temporelle, vous soyes treuve en l'estat de perseverance pour passer a l'eternelle.
Et voyla une bonne commodite qui se presente de rechef a vostre zele en l'establissement des Peres Capucins a Syon, ou, comme vous sçaves, ilz rendront mille sortes de bons et fideles services spirituelz a tout ce pais-la, et beaucoup plus qu'ilz ne pourroyent faire en aucune contree de la patrie ; et croy que mesme cela seroit proffitable au service temporel de Messieurs du païs, pour plusieurs dignes considerations que l'estat des affaires du monde me suggere . Or, comme apres Dieu vous aves le veritable honneur de l'establissement de cet Ordre a Saint Maurice , aussi pouvés vous grandement participer a celuy de l'establissement du mesme Ordre a Syon, ou je sçai que de long tems tous les bons le desirent. Et sur cett'esperance de vostre assistence, et du zele, prudence, bonté et bienfaisance du Reverend Evesque de Valey , j'ay donné courage a ces deux Peres, qui sont vrays serviteurs de Dieu et dignes d'estre aymés, de faire de leur part tout ce qu'ilz pourront bonnement pour ce bon œuvre, que je supplie de rechef la divine Providence de vouloir benir, et de vous faire de plus en plus prosperer en sa grace,
Monsieur, me disant en toute verité,
Vostre tres affectionné, bien humble serviteur,
FRANçs, E. de Geneve.
XXI avril 1621, Annessi.
A Monsieur
Monsieur le Capitaine Quarteri.
St Maurice.
Revu sur l'Autographe appartenant à la famille de M. Oscar de Cocatrix, à Saint-Maurice (Valais).
Chapter 31 of 221