Lettre MDCCLVI. À M. Barthélemy Flocard ( L7, Note 746 )

Heureuse arrivée et saints désirs de Mgr de Chalcédoine. - Mort du Pape; le Cardinal de Savoie en route pour Rome. - Souhait de l'Evêque de Genève.

Annecy, 5 février 1621.

Monsieur,

Je vous remercie tres humblement de vostre douce congratulation sur la venue de mon frere Monsieur de Calcedoine, laquelle a la verité m'a bien apporté de la consolation, non seulement pour l'avoir veu Evesque tout consacré (note 23 ) et desireux de bien servir Dieu et son Eglise, mais aussi pour avoir remarqué en luy des bons talens propres a bien reuscir en cette charge. Mays nostre contentement eüt esté parfait si vous fussies venu avec luy.

Or, ainsy que je vous escrivois ceci, j'ay receu vostre lettre et vostre paquet du 30 de janvier, avec la nouvelle de l'inopiné depart de Monseigneur le Prince Cardinal pour Rome, ou, si tost que je sceu des hier la mort du Pape , je m'imaginay qu'il accourroit pour la nouvelle election d'un autre Pape, a laquelle il pourra beaucoup plus contribuer y arrivant de bonn'heure qu'y allant plus tard. De sorte donq que les Papes meurent aussi bien que les pauvres gens, et que voyla le voyage de France ou tout a fait rompu, ou grandement differé. Que si mes vœux estoyent exaucés, il seroit tout a fait rompu par la promotion de Monseigneur le Prince Cardinal a la papauté, non tant pour lhonneur que j'ay d'estre son tres obeissant serviteur, comme pour le bien que, je m'asseure, en reviendroit au Christianisme. Mays la Providence de Dieu presidera et fera, s'il luy plait, un bon Pape , et moy je demeureray tres invariablement,

Monsieur,

Vostre tres humble et tres affectionné compere et serviteur,

FRANçs, E. de Geneve.

v febvrier 1621, Annessi.

A Monsieur

Monsieur Flocard, Collateral au Conseil de Genevois.

Turin.

Revu sur l'Autographe appartenant à Mlle Helène de Thiollaz, au château de Monpont, près Alby (Haute-Savoie).