Of the chaunge of his lyfe

BUt as hym selfe tolde his neuewe he iudged y• this came thus to passe: by the especiall prouision and synguler goodnes of almyghty god / that by this fals cryme vntruely put vpon hym by his euyll wyllers he sholde correcte his very errours / and that this sholde be to hym (wanderynge in derkenes) as a shynynge lyght: in whiche he myght beholde & consydre: how ferre he had gone out of y• waye of trouth. For before this he had bene bothe desyrous of glory and kyndled in vayne loue: and holden in volupteouse vse of women. The comelynes of his body with the louely fauoure of his vysage / and therwith all his merueylouse fame / his excellēt lernynge[…] grete rychesse and noble kyndred / set many women a fyre on hym / frome y• desyre of whome he not abhorrynge (y• waye of lyfe set a syde) was somwhat fallen in to wantonnesse. But after that he was ones with this variaunce wakened he drewe backe his mynde flowynge in riot & turned hit to chryst / womens blandimentes he chaunged in to y• desyre of heuenly ioyes & dispisynge the blaste of vaynglorye which he before desyred / now with all his mynde he began to seke the glory and profyte of chrystes chyrche and so began he to ordre his condycions y• from thens forth he myght haue ben approued & thoughe his enemye were his iudge.