Of his placabilite or benygne nature

HE was of chere alwaye mery & of so benygne nature y• he was neuer troubled with Ang[…]e & he sayd ones to his neuew that what so euer sholde happen (fell theyr neuer so gtete mysaduenture) he he coude neuer as hym thought be moued to wrath: but yf his chystes perysshed ī whiche his bokes laye: y• he had wt grete trauayle & watche […]piled. But for as moche as he consydered y• he laboured onely for y• loue of god & ꝓfyte of his chyrche: & y• he had dedicate vnto him all his werkes / his studyes & his doynges & sith he sawe y• syth god is almyghty they coulde not miscarye but yf it were eyther by his cōmaundement or by his sufferaunce: he veryly trusted: syth god is all good: y• he wolde not suffre hym to haue that occasion of heuynes. O very happy mynde which none aduersyte myght oppresse / which no prosperyte myght enhaunce: not the connynge of all philosophie was able to make hym proude / not the knowledge of the hebrewe / chaldey & arabie language besyde greke and laten coulde make him vayngloryouse / not his grete substaunce / not his noble blode coulde blowe vp his herte / not y• beauty of his body / not y• grete occasyō of synne were able to pull hym bak in to y• voluptuouse brode way y• ledeth to helle: what thynge was ther of so meruaylouse strength y• myght ouertorne y• mynde of hȳ (which now as seneke sayth) was goten aboue fortune as he: which as well her fauoure as her malice hath set at nought / y• he myght be coupled wt a spiritull knot vnto chryste and his heuenly cytezeynes.