III. Hoe die ewighe gheboirt Gods sonder onderlaet vernuwet in edelheit des gheests

Alse wi aldus siende sijn worden, soe moghen wi in vrouden scouwen die ewighe toecomst ons Brudegoms, dat dat ander poent es daer wi af spreken willen. Welc es nu die toecomst ons brudegoms, die ewich is? Dat is die nuwe gheboert en̄ een nuwe verclaren sonder onderlaet¹; want die gront, daer die claerheit uut scijnt en̄ die claerheit selve is, hi is levende en̄ vruchtbaer: en̄ hieromme wert die openbaringhe des ewichs lichts sonder onderlaet vernuwet in die verborghenheit des gheests. Siet, alle creatuerlike werke, en̄ alle oefeninghe der doghede moet hier onderbliven, want hier werket God hem selven allene in die hoechste edelheit des gheests. En̄ hier en is anders niet dan een ewich scouwen en̄ staren dat licht, metten lichte en̄ inden lichte. En̄ die toecomst des brudegoms es alsoe snel, dat hi altoes comende is, ende inblivende met grondeloser rijcheit, en̄ persoenlic sonder onderlaet nuwe, met alsulker nuwer claerheit comende es, rechte ofte hi voere nye comen en ware. Want sijn comen besteet, sonder tijt, in enen ewighen nu, dat altoes in nuwer ghelost, ende in nuwer vrouden wert ontfaen. Siet, die weelde ende die vroude die dese brudegom bringhet in sire toecomst, die is grondeloes en̄ onghemeten, want hi eest selve. Ende hier omme sijn die oghen des gheests, daer hi met scouwet en̄ anestaret sinen brudegom, soe wide ontploken, datse nemmermeer en werden gheloken. Want staren en̄ scouwen des gheests blivet ewich in die verborghene openbaringhe Gods. En̄ dat begrijp des gheests is soe wide ontploken jeghen die toecomst des brudegoms, dat die gheest selve die wijtheit worden es die hi begripet. En̄ aldus wert God met Gode begrepen en̄ ghesien, daer al onse salicheit in gheleghet. Dit is dat ander poent, hoe wi die ewighe toecomst ons brudegoms in onsen gheeste sonder onderlaet ontfaen.