2. [Die andere Becoringhe]

Hier na volcht die andere becoringhe; ende ute hare comt ene andere wise van dolinghen, die deser ierster wisen contrarie is¹: want dese naeste dolinghe comt ute enen gheveinsden gheeste, die grote heylicheit bewijst² daer ghene en is. En̄ hier met³ machmen proeven⁴ dat vele menscen vallen ende ewelic dolen, die nochtan gheestelic ende heylich scinen. Nu verstaet. Soe wat mensche die aengrijpt een versmaet abijt en̄ een hert leven van penitencien, en̄ begheeſt mage en̄ vriende, ende erdsch goet, ende allen troest der werelt: eest dat hi meer mint en̄ meint hem selven en̄ sijn profijt, dan die ere Gods, soe is hi onghestadich en̄ bereet tote quaden ghepeinsen, en̄ tote doeren invallen, en̄ tote alre gheesteliker becoringhen en̄ dolinghen; want hi weret sine werke uut eyghenheiden sijns selfs, ende hi is wederboecht op hem selven⁵. En̄ al eest dat hi Gode mint en̄ dient⁶, dat is te male omme sijns selſs orbore. En̄ hier omme is sine minne nature en̄ niet ghenade; want hi en is sijns selfs niet ghestorven, noch hi en wilt hem niet saten⁷ onder den vrien wille Gods⁸. En̄ hier omme en dar hi Gode niet wel betruwen; want sine nature en wil niet wiken, mer si wil seker sijn. Ende hier omme begheert hi Gode te hebbene te sinen wille en̄ te sinen gherieve, dat is dat hem God vore andere menschen sonderlinghe⁹ si, en̄ dat hi hem sende enen inghel ofte enen heylighen, die segghe ende leere hoe hi leven sal, ende ofte sijn leven Gode behaghet. En̄ sele begheert dat hem God sinde enen sonderlinghen brieſ met guldenen letteren, ofte in visioene ofte in drome vertoene¹⁰ sinen wille. Siet, dit comt dicwile van gheesteliker hoverden, dat hem dunct dat hi weerdich is selker sonderlincheit¹¹. Want al eest ghesciet selken heylighen¹², dat en selen dese menschen te exempele niet trecken. Ende hier omme werdense dicwile bedroghen; want dat die heylighen leerden ende leefden, dat achten si eleine, maer si souden gherne gaen enen sonderlinghen wech, die niet ghesien noch ghehoirt en hadde gheweest. Want soe wie hem selven meer meint, en̄ sine eyghene ere, dan die ere Gods, daer uut wast ypocrisie, dat is een hoverdich gheveinst leven. Ende hier omme anegripen si sonderlinghe ghetoende wisen van buten, op dat si heylich heeten mochten ende, overmits die sonderlinghe wisen, anderen menseen behaghen. Want waer een hert leven is van penitencien, ende ene ghetoende wise van buten sonder grote oetmoedicheit van herten, daer is altoes gevenstheit mede. En̄ hier omme en connen dese menschen niet wel gheliden dat yeman heylich hete dan si, oſte datmen van yemene meer houde dan van hem. Want si sijn gheestelic hoverdich, alse die pharizeeuse waren; ende hem dunct dat si verstendich en̄ wijs sijn: nochtan sijn si ruut¹³ ende plomp, want si setten die hoechste heylicheit in uutwendighen werken. Ende eest alsoe dat onse Here ghedoecht dat hem die viant vertoene drome ende visioene, daer si in glorieren ende hen¹⁴ selven behagen: dan werden si noch meer bedroghen, en̄ soe eyghen in hem selven¹⁵, dat si cume nemmermeer bekeren moghen. Ende dat is die andere wise daer die viant die eyghene menschen¹⁶ mede becoert, die onghelatens willen sijn ende hem selven besitten met ongheordender lieſden, die si tote hem selven hebben.