3. [Die derde Becoringhe]

Die derde becoringhe, die hier na volcht, die is noch subtijlder te verstane, en̄ daerin vallen en̄ verdolen, overmits des viants raet, alle die ghene die ene gheestelike wise willen voeren, en̄ subtijl sijn van sinne, en̄ scale en̄ behendich in natuerliken verstane, eest dat si die nature oefenen willen sonder caritate en̄ oetmoedicheit van gheeste, na lost der naturen¹. Want hare nature en̄ hare inwendighe sinne bloyen² en̄ glorieren inden lichte der naturen³. En̄ dit natuerlic licht besitten si met alsoe groter wellust en̄ eijghenheit, dat hen dunct dat si alle waerheit, en̄ al datmen leven⁴ mach⁵, begripen en̄ verstaen moghen sonder die overnatuerlike hulpe Gods. En̄ hier in werden si bedroghen, ende vallen in des viants raet ende in ene gheestelike hoverde, die alsoe op draghende is van moede⁶, dat si selden bekeren connen. Want selke wanen met natuerliken lichte ghereyken en̄ begripen die ierste waerheit; en̄ si willen met hare const graven⁷ en̄ doergronden die verborgene heymelicheit der Scrifturen⁸, die die gheest Gods ghedicht⁹ heeft in die ewighe wijsheit¹⁰. Ende overmits hare hoverde, soe dunct hen dat si alle die Scrifture claerre, en̄ nare¹¹, en̄ bat verstaen¹² dan die heylighen daden diese ghescreven, en̄ gheleert, en̄ gheleeft hebben. Want si wanen¹³ die wijste der werelt sijn; ende alle hare oefeninghe dat is inweindich ymagineren en̄ studeren, ende argueren de Scriſturen alsoe verre als sijt¹⁴ dorren doen. En̄ andere menschen, die een eenvoldich heylich leven leiden ofte een hert leven van penitencien, die achten si alse grove esele¹⁵ ende beesten; want si behaghen hen selven¹⁶ boven andere menschen. En̄ si hebben meer inwendichs smaecs en̄ vrouden¹⁷ in die dinghen die si van binnen¹⁸ met redenen¹⁹ bevinden ende verstaen, dan in die dinghen die boven redene sijn, diemen gheloven moet en̄ die ons ewige salicheit gheven. Ende hier omme sijn si alse²⁰ ongelovighe heydene menschen, die Gods niet gheware²¹ en werden²². Altoes willen si nuwe dinghen uutspreken²³ met loste der naturen, want si werken ende spreken uut eyghenheit haers selfs: en̄ daer omme moetense hem selven behaghen, en̄ eyghene ere soeken, ende hoverde bewisen al en merken sijs selve niet. En̄ al meest²⁴ hebben si een zwaer wesen van buten, ende een rijp²⁵, besedt²⁶ aenseijn, ende ene opdraghende onwerdighe maniere tote anderen menscen²⁷. En̄ si nemen gherne grote costelike noetorft²⁸ haers lichamen in allen dinghen²⁹; en̄ si beghe- ren datmen hem ere biede, ende dat si gheacht sijn boven andere menschen.

Siet, dit is die derde wise van becoringhen: hier mede werden bedroghen alle die subtile menschen die, in natuerliker wijsheit ofte in gheleerder const, hem selven verheffen en̄ behaghen, en̄ met hem selven ende met haren eyghenen lichte clymmen willen sonder die ghenade Gods.