Lettre CCLXXIV. À Madame Bourgeois, Abbesse du Puits-D'orbe

Dieu console ses amis en même temps qu'il les afflige. – Les " livrees " de Notre-Seigneur et les bagues de ses épouses. - Marques d'intérêt et de sympathie. - Les véritables idées du Saint pour la réformation du monastère du Puits-d'Orbe. - Prendre les lumières d'un Religieux Visiteur.

Annecy, 18 février 1605. Madame,

J'eusse egalement desiré de pouvoir vous visiter tous les jours par mes lettres et d'estre visité par les vostres, pour participer au bien et au mal que Dieu a mis en vous depuis l'ouverture de vostre jambe. Je m'asseure que l'un et l'autre a esté grand, car c'est la coustume de nostre bon Dieu ( 2 Co 1,3 ) de ne point envoyer des afflictions et tourmentz a ceux qui l'aiment, qu'il ne leur envoye quant et quant des grandes consolations, et, comme dit le Psalme ( Ps 93,19 ), selon la multitude des tribulations,

ses

delectations rejouissent nostre ame. Mais sçavez vous ce que j'ay pensé ? L'Escripture dit que la porte du Royaume des cieux, c'est a dire du service et de l'amour de Dieu, n'est autre chose que la tribulation ( Ac 14,21 ) ; et la dessus j'ay dit a moy mesme que vrayement Dieu vous avoit choisie pour estre fille de son royaume, puysque a ce commencement de vos resolutions il vous avoit fait passer par la porte ordinaire et plus certaine.

Ce fust une grande gloire que celle de saint Paul quand il disoyt ( Ga 6,17 ) : Au reste, que nul ne m'importune, car je porte les stygmates

et marques de mon Seigneur a mon corps. Mais maintenant, vous devez, ce me semble, estre bien glorieuse, ayant receu au moings une de ses marques ; car, sans doubte, les marques de Nostre Seigneur ne sont autre chose que des playes : ce sont les livrees qu'il fait porter aux siens et les bagues qu'il donne a ses espouses.

Je ne doute point que vous n'ayez fait plusieurs semblables considerations, lesquelles vous auront extremement consolée. Pour moy, je me le suys promis de la bonté de Dieu et m'en suys resjoui devant sa Majesté. Mais affin de combler ma joye, faites moy ce bien, je vous prie, de me faire escrire par quelqu'une de vos plus confidentes du succez de vostre maladye, de laquelle monsieur vostre pere m'escript, mais en gros. Il est infiniment ediffié de vos deportementz et de tout ce qui est en vostre Monastere, Il craint neantmoings tous jours que vous ne passiez a quelque extreme severité et mortification exterieure, et ne se peut asseurer que je ne vous y porte. Il se trompe toutesfois bien fort, car si j'avois autant de pouvoir que j'ay de vouloir pour servir a l'entiere reformation de vostre Monastere, non seulement je ny mettrois pas de la rigueur exterieure, mais y mettrois une bien grande douceur ; ce seroyt a l'interieur ou j'applicquerois toutes mes pensees.

J'ay sceu qu'il y avoit a Dijon un grand personnage de vostre Ordre, rare en pieté et discipline religieuse, et qui est Visiteur du monastere de Fontesvreau . A l'advanture seroyt il bon que vous le vissiez et prissiez quelques leçons de luy pour la police de vostre Maison, car il n'est pas qu'il n'ayt une grande cognoissance de semblables choses,

Les medecins m'ont tant crié de ne point escrire sitost apres ma maladie que, pour obeir, je vous ay escrit par la main d'autruy. Ayes-le aggreable, ma chere Fille. Et voyla comme nostre bon Dieu m'a voulu donner un bout de sa croix pendant quil vous avoit imposé le gros de l'arbre. Benissons le, servons le, aymons le de tout nostre cœur ! ma chere Seur, ma bonne Fille ! et courage ! je vous supplie. Tenes vous asseuree que je suis infiniment vostre, et que je ne cesse de vous souhaitter mille et mille benedictions.

Vostre serviteur tres dedié en Nostre Seigneur,

FRANçs, E. de Geneve.

A Neci, le XVIII febvrier 1605. Je vous escriray bien tost et de la façon avec laquelle vous pourres employer monsieur Viardot , encor quil ne demeure pas en vostre Mayson, comm'il ne sçauroit, a ce que j'apprens. Je me recommande a madame vostre seur et a madame de Thenissey .

A Madame

Madame l'Abbesse du Puis d'Orbe.

Revu sur l'original conservé à la Visitation d'Annecy .