Lettre CCLXXXI. À M. Claude de Crépy

Paroles de courtoisie. - Dévouement du Saint à l'entreprise de l'Abbesse du Puits-d'Orbe. - La santé du corps et les consolations de l'âme. - Jeanne de Sales proposée comme pensionnaire à l'abbaye.

Vers le 20 avril 1605 ,

Monsieur mon tres honnoré Pere,

Que vous m'obliges a vous rendre une vraye et entiere obeissance filiale par la faveur qu'il vous plaist me faire en m'escrivant si souvent et de vostre santé et de l'estat des affaires de madame l'Abbesse, ma tres chere Seur ! Rien sans doute ne me peut donner plus de consolation que de me voir vivre en vostre souvenance et bonne grace, et de vous estre aggreable au desir que j'ay de servir cette Seur en tous ses vertueux desseins, pour la poursuitte desquelz j'appreuve bien qu'elle ne change pas le chemin que je luy ay proposé, qu'avec beaucoup de consideration. Mais je ne voudrois pas aussi qu'elle laissast pour cela de se prevaloir des bons advis et conseilz qu'elle peut recevoir d'ailleurs, et particulierement du bon Pere de Saint Benigne , duquel vous m'escrives, et moy a elle, pour luy en declarer mon opinion telle que je vous dis.

Mais comment me pourrois je jamais lasser de souhaitter des graces et des benedictions abondantes a cette chere Seur et a toute sa Mayson, la voyant si desireuse de mon bien que, pour seulement sçavoir de ma santé, elle m'a envoyé un expres ? Avec cette occasion, je luy ay escrit le plus amplement que j'ay peu pour la consoler, sachant bien que le bon portement de son cors depend beaucoup de celuy de son ame, et celuy de son ame, des consolations spirituelles. Je vis en perpetuelle apprehension de son mal qu'il n'empire, et en recommande a Dieu les remedes autant qu'il m'est possible. Ce n'est pas de mon eschole qu'elle a jeusné ce Caresme contre l'opinion des medecins, a l'obeissance desquelz je l'exhorte bien fort, sachant bien Dieu seul estre servi comme cela ( Eccli 38,1 ).

Au demeurant, Monsieur mon tres honnoré Pere, j'ay une jeune seur que je desirerois mettre aupres de cette aisnee et plus chere en son Monastere, non pour estre Religieuse, si Dieu ne luy en donne l'inspiration, mais seulement pour avoir cet honneur d'estre aupres d'elle et d'apprendre la vertu en une si bonne compaignie. C'est la une de mes ambitions, mays de laquelle je sousmetz l'execution a vostre commandement, n'en voulant que ce qu'il vous plaira de m'en permettre. Que s'il vous plaist m'en donner la permission, ce sera, Dieu aydant, sans que la Mayson en reçoive aucune charge ; madame l'Abbesse seule en sera importunee de seulement supporter l'incommodité de voir aupres de soy une inutile et maussade fille et servante.

Vous voyes, Monsieur mon Pere, avec quelle liberté je me pousse envers vous. Croyés, je vous supplie, que c'est pour la totale confiance que j'ay d'estre en vostre ame ce que je suis en la mienne ; c'est,

Monsieur mon Pere,

Vostre tres humble filz et serviteur,

FRANçs, E. de Geneve.

Monsieur mon Pere, permettes moy de presenter icy mon tres humble service et obeissance a madame ma mere , que je supplie de me continuer en l'honneur de sa maternelle bienveuillance.