Lettre CCLXXVI bis. (ndlr. Lettre Découverte Après Impression des Volumes des Lettres, Placée P.481 au Tome Xxvi, Répertoriée Cclxxvi. Comme l'Indique la Note 26, Cette Lettre Doit Remplacer la Précédente.)

A LA BARONNE DE CHANTAL

La santé est inutile si elle n'est employée à la " conqueste de la sainteté. " -Ecrire à la Baronne ne peut nuire au Saint. - Plus la croix est grande, moins elle pèse. - Pieux souhaits, ardentes aspirations à propos d'une " image devote ". - Un projet de voyage à Annecy et une décision. - Avis de saint François de Sales touchant le désir de Mesdames Brûlart et de Villers d'accompagner en Savoie Mme de Chantal. - Mme de Boisy recevra celle-ci " avec plus de cœur et d'amour ". - Prière de l'excuser auprès de MM. Frémyot, père et oncle .

La Roche, 28 février 1605. Madame,

J'ay receu vos deux lettres du 3 et XVII febvrier, et pense qu'a mesme tems vous aurés eu celle que je vous escrivis par monsieur de Maillans , laquelle vous aura tout entierement asseuré de ma santé, miserable santé qui, jusques a present, n'a point esté employee a la conqueste de la sainteté. Prions Dieu, ma chere Seur, qu'il m'oste tout le soin que j'ay de celle la, sinon entant quil regardera l'acquisition de celle ci. Que si elle doit estre autant inutile ci apres qu'elle l'a esté jusques a present, il n'est pas expedient d'en desirer la conservation. Mais laissons-la la, elle ne merite pas que nous y pensions.

Il est vray que les medecins m'ont defendu d'escrire le soir apres souper, qui est le seul tems duquel je puis disposer; mais il (sic) ne m'ont pas defendu de vous escrire en plein jour, comme je fay maintenant . J'ay tant de suavité au desir que j'ay de vostre bien spirituel que tout ce que je fay sous ce mouvement ne me sçauroit nüyre. Je vous escriray donques, et ne vous desplayse, et le plus souvent que je pourray. Vos lettres, pour longues qu'elles soyent, ne me sont jamais que trop courtes. Trefves a toutes ces considerations ; les amitiés cimentees au sang de l'Aigneau n'ont pas besoin de tant de ceremonies.

Vous me dites que vous portes tous-jours vostre grande croix, mais qu'elle vous pese moins par ce que vous aves plus de force. O Sauveur du monde, que voyla qui va bien ! Il faut porter sa croix ( Lc 14,27 ) ; quicomque la portera plus grande s'en treuvera mieux. Dieu donques nous en veüil1e donner des plus grandes, mais quil luy playse nous donner des grandes forces pour les porter. Or sus, donques, courage: Si vous aves confiance vous verres la gloire de Dieu ( Jn 11,40 ) .

Je ne vous respons pas maintenant, car je ne sçaurois ; je ne fay que passer legerement sur vos lettres. Je ne vous envoyeray rien a present pour la reception du tressaint Sacrement; si je puis, ce sera a la premiere commodité.

Je vis un jour un'image devote : c'estoit un cœur sur lequelle petit Jesus estoit assis. 0 Dieu, dis-je, ainsy puissies-vous vous asseoir sur le cœur de cette fille que vous m'avés donnee et a laquelle vous m'aves donné. Il me playsoit en cett'image que Jesus estoit assis et se reposoit, car cela me representoit une stabilité ; et me playsoit quil y estoit enfant, car c'est l'aage de parfaitte simplicité et douceur. Et communiant au jour auquel je sçavois que vous en faysies de mesme, je logeois par desir ce beny Hoste en cette place et chez vous et chez moy.

Vous me demandés quand ce sera que vous viendrez de deça. Je respons sans ceremonies et vous dis: Si vous voules venir au printems, venes entre Pasques et la Pentecoste praecisement, car passé cela je seray a la Visite, Dieu aydant. J'excepte de ce tems la troysiesme semayne apres Pasques quil faut que je vacque a nostre Sinode ; passé cela, au tems quil vous plaira, j'en suis prest. Mais je vous adjure de venir en tems et en equippage tel que je vous puisse voir au moins huit jours durant, car il faut bien cela pour bien establir toutes les pieces de nostr'interieur, lesquelles il faudra sans doute revoir, pour voir sil y a quelque defaut. Et ce qui me fait prendre cette resolution, c'est ce que vous me dites quil faut qu'il y ait quelque chose en vostre esprit qui n'aye pas esté satisfait. Et puis, je veux que cett'entrevëue serve pour plusieurs annees : quand donques vous aures plus de loysir tout en ira mieux .

Madame Brulart desireroit de venir, mais je n'en suys nullement d'advis pour le respect de sa condition qui ne me permet pas d'en conclure autrement ; mais je feray bien que vostre voyage luy servira. Quant a madamoyselle de Vilers je n'ose pas luy dire que non, si elle croit que le voyage luy soit fort utile et que monsieur de Vilers le luy permette .

J'ay choysi le lieu de nostre entrevëue chez ma mere, au (sic)

chams, par ce qu'en la ville je ne puis pas dire qu'un seul quart d'heure soit a ma disposition, et aussi que vostre hostesse vous y recevra mieux, c'est a dire avec plus de cœur et d'amour . Reste que vous prenies vostre resolution, et d'ores en avant je remettray beaucoup de choses a ce tems-la, et a la premiere je vous diray ce que je desire que vous praepariés en vostre esprit pour apporter a cett' occasion.

Excuses moy vers messieurs vos pere et oncle qui m'ont escrit, car je n'ay nul loysir que celuy d'entre le sermon et le disner pour faire ce petit despeche. Conferés avec madamoyselle de Vilers du voyage, mais en sorte que si elle n'est pas desireuse de venir elle n 'y soit point provoquee, car je crains tous-jours les desgoustz des maris pour ces voyages.

Dieu soit en tout et sur tout beni, et veüille se saysir de nos cœurs es siecles des siecles. Amen.

Vostre serviteur tres dedié es entrailles de N. Sr.

FR †

A La Roche, XXVIII febvrier 1605. Il sera necessaire de m'advertir du tems auquel vous voules venir, et que tout cela soit avec fort peu de bruit. Dieu demeure avec vous.

A Madame

Madame la Baronne de Chantal.

Revu sur l'Autographe appartenant à M. le chanoine Minat, à Saint-Dizier (Haute-Marne).