Lettre DXXXVIII. Au Père Claude-Louis-Nicolas de Quoex, Prieur du Monastère de Talloires

La réforme dans un monastère demande une grande longanimité dans l'exécution et un cœur généreux. - l'exemple de Notre-Seigneur. - Les exercices de piété ; l'habit, le mobilier, etc. ; la " composition exterieure " et son importance dans une Communauté. - Conditions du succès.

Annecy, 10 juillet 1609.

Monsieur,

Puisque Dieu a choisi un nombre de personnes fort petit, et encor des moindres de la Mayson en aage et en credit, il faut que le tout s'entreprenne avec une tres grande humilité et simplicité, sans que ce petit nombre face semblant de vouloir reprendre ou censurer les autres par paroles ni par gestes exterieurs; ains que simplement il les edifie par bon exemple et conversation .

Le commencement estant si petit, il faut avoir une grande longanimité a la poursuitte, et se resouvenir que Nostre Seigneur, apres trente trois ans, ne laissa que six vingtz disciples bien assemblés, entre lesquelz il y en eut encores beaucoup de discoles. La palme, reyne des arbres, ne produit son fruit que cent ans apres qu'elle est plantee. Il convient donq estre doüé d'un cœur genereux et de longue haleyne en un œuvre de si grande importance. Dieu a fait des reformations par des moindres commencemens, et ne faut rien moins pretendre qu'a la perfection.

Et pour venir au particulier, mon advis est que toute vostre sainte brigade soit soigneuse de se communier devotement, a tout le moins une fois chaque semaine. Qu'on luy apprenne de bien et deüement examiner sa conscience tous les soirs ; qu'on luy monstre a faire convenablement l'orayson mentale, selon la disposition des sujetz ; sur tout qu'on luy enseigne a obeir au directeur tres volontairement, tres fermement et tres continuellement.

Quant a l'habit, je ne pense pas qu'il soit a propos .de le changer qu'apres que l'annee sera expiree ; bien desirerais-je qu'il fust en tout le plus uniforme que faire se pourra, tant en sa forme qu'en sa matiere, et que le froc fust large, a la façon des Benedictins reformés. Il me semble qu'on doit garder la chemise pour l'honnesteté, pourveu toutefois que le collet ne soit pas immoderement estendu, ains fort sobrement et d'une mesme maniere. Chacun aussi portera la ceinture et le bonnet de mesme façon, et le tout bien proprement.

Pour le regard des litz ; plus ilz seront simples, plus aussi seront ilz a propos. Que chacun ayt le sien, et qu'ilz soyent tellement disposés, qu'en se couchant ou levant on ne se voye point les uns les autres, affin que les yeux mesmes soyent mondes et netz.

J'appreuverois fort que ceux qui portent barbe fussent bien rasés a la teste et au menton, selon les anciennes coustumes des Benedictins ; et que, tant qu'il sera possible, on n'allast plus seul a seul, ains tous-jours avec un compaignon.

Il sera expedient qu'aux divins Offices le petit troupeau entre, demeure et sorte ensemblement, avec mesme contenance et ceremonie, d'autant que la composition exterieure, soit aux Offices, soit a table, soit en public, est un puissant motif pour beaucoup de bien.

A ce commencement, il n'est pas necessaire d'adjouster aucune abstinence a celle des vendredis et des samedis, sinon celle des mercredis, selon la vielle coustume et mitigation observee au Monastere.

Voyla mon petit advis pour ce commencement. La fin pretenduë sera bien autre chose, Dieu aydant : car, comme vous sçaves, primum in intentione est ultimum in executione (la première chose en l'intention est la dernière en l'exécution). Mais pour bien servir en cette besoigne, il faut avoir un courage inexpugnable et attendre (le fruit dans la patience) fructum in patientia (Lc 8,15). Je sçay et voy vostre Regle qui dit merveilles ; il n'est pas pourtant expedient de passer d'une extremité a l'autre sans milieu.

Plantés bien avant, Monsieur, cette affection dans vostre cœur, de restablir (les murs de Jérusalem.) muros Hierusalem (1 Mc 12,36) : Dieu vous assistera de sa main. Sur tout prenes garde d'user de lait et de miel (Ct 4,11), parce que les viandes solides ne pourroyent pas encor estre maschees par les foibles dens des invités (1 Co 3,2).

A Dieu, et ayés bon courage d'estre l'un de ceux (par lesquels le salut sera fait en Israël.) per quos salus fiet in Israel (1 Mc 5,62).

Vostre confrere et serviteur affectionné

en Nostre Seigneur,

FRANçs, E. de Geneve.

D'Annessy, ce 10 julliet 1609.