Lettre DCCCV. À Madame de Geneve, Abbesse de Baume-Les-Dames

( INEDITE)

Offre conditionnelle d'une postulante, fille de Gallois de Sales. - Ce qui rebutait quelquefois les prétendantes à la Visitation. - Portrait de la nièce du Saint.

Annecy, 19 septembre 1612.

Madame ma tres chere Mere,

Je fus certes en peyne de vostre chemin d'icy a La Roche , voyant que [le] tems s'aigrissoit un peu; et Dieu soit loüe dequoy vous l'aves passé-asses heureusement. Vostre conseil a este tres bon d'envoyer prendre le carosse, et ce pendant donner la consolation de vostre veüe a madame la Comtesse vostre seur .

J'ay veu despuis vostre depart Mme de Chantal, qui vous honnore d'un honneur fort particulier et desire que tous-jours je vous supplie de la tenir en vostre bonne grace ; ce que je fay de tout mon cœur.

Au demeurant, soudain apres vostre despart, mes freres entrerent en un'ambition d'obtenir une place de Religieuse en vostre l\lonastere pour un'unique niece, fille de nostr'aysné , que nous avons ; et m'a fallu leur promettre que je vous en supplierois, de cette grace. C'est pourquoy je le fay, avec la reserve de vostre bon playsir, pour le tems et pour toutes autres conditions, et encor pour la chose mesme, laquelle je ne veux vouloir qu'a mesure que cela se pourra faire sans vostre incommodité, vostre contentement m'estant plus cher que tout l'honneur qui pourroit arriver a ma niece, laquelle, pour ne rien celer a ma tres chere et tres honnoree Mere, je m'essayeray de gaigner pour la Visitation ; mais par ce que les humilités quil y faut exercer rebuttent quelquefois les filles, si je ne puis la tourner de ce costé la, j'imploreray encor de plus fort vostre faveur. La fille est bien jolie et d'asses bon esprit, et fille d'une mere que je puis nommer sainte, et damoyselle de bon lieu .

J'eusse bien voulu que je vous eusse fait la supplication a bouche et en presence, car je vous eusse encor mieux tesmoigné combien je desire qu'elle ne soit respondüe sinon avec toute consideration de la commodité ou incommodité qu'il y peut avoir, vous asseurant que je n'ay null'affection a cela sinon entant que vous le jugeres a propos et le treuveres bon, et que vous pouves user de ma volonté en ceci et en tout'autre occurrence a vostre gré, librement et franchement, comme doit et peut faire une mere envers

Son tres humble filz et tres fidele serviteur,

FRANÇs, E. de Geneve.

19 septembre 1612.

A Madame

Madame l'Abbesse de Baume.

Revu sur l'Autographe appartenant à Mme de la Garde, à Besançon.