Lettre DCCCXV. À Madame de la Fléchère
Ce que réservait le Saint dans ses demandes à Dieu. - Petites nouvelles. Annonce du départ de la Galerie.
Annecy, 21 octobre 1612.
Je vous fis response l'autre jour, ma chere Fille, sitost que j'eu leu vostre lettre ; mais le garçon qui l'avoit apportee ne revint pas prendre la mienne, laquelle je vous envoye encores toute telle que je la fis.
Certes, j'ay esté en peyne de la pauvre chere Francine , laquelle j'espere devoir estre une bonne servante de Nostre Seigneur et qui ne laissera pas, moyennant la grace cœleste, d'aller au Ciel apres avoir rendu des bons services a Dieu entre les hazars de cette vie mortelle. C'est pourquoy, sa divine Bonté soit loüee de la nous avoir encor laissee, comme je l'en ay supplié, avec la reserve de la sainte resignation, que je n'oublie jamais en choses de telle qualité.
J'ay fait tenir vostre lettre au P. Gardien , et celle de Mme l'Ancienne sera rendue demain. Ce fut avant-hier seulement que je receu vos lettres bien tard, que la chere cousine ( Mme de Charmoisy ), a qui elles avoyent esté portees, m'envoyâ. J'envoyay a M. des Crilles ce qu'elle desiroit de moy (lettre 814 ), et croy que vous aures fait tenir a nostre seur de Bons la lettre que je vous addressay. Dieu vous benisse de sa grande benediction, ma tres chere Fille, et tout ce qui vous est plus cher.
Hier monsieur vostre mari et M. de Charmoysi allerent coucher a Thoreng parmi un tres mauvais tems. Mme de Chantal vous salue mille foys, des l'autre jour que je la vis. Lundi prochain, ell' ameyne sa trouppe dans la ville . Voyla le P. Gardien qui m'appelle, et je m'yen vay, vous laissant avec la paix et grace du Saint Esprit.
Je suis tres veritablement et tres parfaitement tout vostre. F.
Vostre plus humble tres affectionné compere et serviteur,
F. E. de G.
Le 21 octobre 1612.
A Madame
Madame de la Flechere.
Revu sur l'Autographe appartenant à M. de Scitivaux, à Vilet-les-Nancy (Nancy).
Chapter 160 of 217