Lettre DCCCXXIV. À la Présidente Favre

Une âme qui va bien. - L'amour de Dieu et la paix. - Les voies du Ciel. - Précaution contre les " babillardz ". - Ce que pensait le Saint des Ursulines et des institutrices chrétiennes. - Les entreprises extraordinaires qui ne sont pas hasardées. - Un monastère de seize bonnes filles, où rien n'abonde ni ne manque. - La pauvre Thiollier.

Annecy, 18 novembre 1612.

Ma tres chere Seur,

J'ay receu vos deux lettres, toutes douces et de bonnes nouvelles ; car vostre chere ame va bien, puisqu'elle veut bien s'avancer au saint amour de Nostre Seigneur. Faysons bien cela, ma tres chere Fille, car en fin,

tout le reste n'est que vanité ( Eph 1,2 ; 12,8) . Et parce que l'amour ne loge qu'en la paix, soyes tous-jours soigneuse de bien conserver la sainte tranquillité de cœur que je vous recommande si souvent. Que nous sommes bienheureux, ma chere Seur, d'avoir des travaux, des peynes et des ennuis ! car ce sont les voyes du Ciel, pourveu que nous les consacrions a Dieu.

Je vous renvoye les papiers de devotion, que je treuve bien utiles ; mays si on les imprimoit, je ne voudrois pas que vostre nom y fust descouvert, pour ne point donner lieu aux babillardz d'en parler, et sur tout l'œuvre estant si courte.

Vous pouves bien, ce me semble, choisir ce bon Pere la pour vostre confesseur , puisqu'aussi bien le Pere Recteur est souvent empesché.

Nos bonnes Dames de la Visitation font extremement bien, et quand leur logement sera du tout accommodé, elles seront tres bien ou elles sont maintenant ( notes 448, 516) . Vostre fille chemine fort devotement et se porte tres bien. La bonne Mere de Chantal est presque guerie et a aujourd'huy esté a la sainte Messe .

Ce seroit un tresgrand bien qu'a Chamberi il y eust des Ursulines et voudrois bien y pouvoir contribuer quelque chose ; car en fin, bonheur a ceux qui nourrissent les enfans pour l'amour, crainte et service de Dieu. Il ne faut que trois filles ou femmes courageuses pour commencer; Dieu donnera l'accroissement. Nos Dames de la Visitation doivent donner courage d'entreprendre, a celles qui seront tant soit peu disposees. Selon mon jugement, ce n'est pas hazarder que de se confier un peu extraordinairement a Nostre Seigneur es desseins de son service. .

Ma tres chere Seur, ma Fille, aymés tous-jours bien mon ame, qui ayme tant la vostre. Je suis en Nostre Seigneur, tout vostre.

Vostre tres humble et tres obeissant

frere et serviteur,

FRANÇs, E. de Genève.

18 novembre 1612, a Neci.

La bonne Thiollier sera, a mon advis, fort consolee en cette Congregation , laquelle se treuvera composee, mercredi prochain, de seize bonnes filles , laissant a part celles qui sont receuës et qui ne peuvent encor venir. Des-ormais on sera en peyne a refuser, et neanmoins il le faudra faire, si ce n'est pour quelque personne qui puisse rendre quelque extraordinaire service a Nostre Seigneur. Et quant aux moyens, rien n'y abonde et rien n'y manque ; Dieu a soin de ses servantes et Nostre Dame les pourvoit.. Il vous faut tous-jours dire des nouvelles de cette petite assemblee, laquelle, comme je croy, vous est chere.

La pauvre Thiollier estoit si empressee, qu'elle oublia le pacquet de la bonne madame d'Aiguebelle , a laquelle partant je ne sçaurois respondre. Je salüe de tout mon cœur ma tres chere niece .

A Madame

Madame la premiere Presidente de Savoye.