Lettre DCCCXXI. Au Duc de Bellegarde

( MINUTE)

Menaces et prétentions des pasteurs protestants. - Précaution que propose l'Evêque de Genève pour les atténuer. - Eloge de M. Milletot.

Annecy, 10 novembre 1612.

Monsieur,

Je laisse a monsieur Milletot le contentement de vous representer l'heureux sucees de la commission que le Roy luy avoit donné pour l'execution de l'edit de Nantes a Gex (lettres 799, 800) , et me reserve seulement de vous faire un tres humble remerciment pour le soin continuel que vostre zele a du restablissement de la gloire de Dieu en ce miserable balliage, ou l'heresie, qui a si longuement foulé aux piedz la pieté, nous menace encor maintenant, aussi effrontement que jamais, de rendre vaine l'esperance que nous avons en vostre protection ; comme si le credit des pretendues eglises de France estoit plus puissant pour nous empescher le renversement de l'effectuelle jouissance de nostre juste pretention, que la justice de la Reyne et vostre intercession pour faire maintenir un arrest si equitable et si saint, comm'est celuy en vertu duquel l'edit a esté execute.

Mais, Monsieur, comme c'est nostre bonheur d'avoir une foy contraire a celle des huguenotz, aussi nous glorifions-nous d'avoir une esperance opposee a leur presomption ; a rayson dequoy, tous les Catholiques de Gex, et moy, plus que tous, esperons et espererons tousjours de voir tous les jours quelque progres de nostre sainte religion en ce petit bout de royaume qui. est si heureux d'estre sous vostre gouvernement. A quoy ne serviroit pas peu si monsieur Milletot, qui a si dignement prattiqué sa commission, avoit quelque charge particuliere d'ordonner et connoistre de tout ce qui en dependroit, par maniere de surintendance aux officiers de la justice ; car iceux estans de contraire religion a la nostre, ce nous seroit un grand bien d'avoir qui eust un soin particulier de nous, comme auroit ledit sieur Milletot, qui certes a tesmoigné une grande prudence et bonn 'affection en cette occurrence,

Mais, Monsieur, vostre sagesse vous suggerera ce qui sera plus a propos sur ce point, et moy, ce pendant, je continueray mes souhaitz devant Nostre Seigneur pour vostre prosperité, affin qu'il luy plaise vous en combler a jamais, Je suis…………………………….

.

Ce 10 novembre 1612

Revu sur le texte inséré dans le 1 er et le 2 e Procès de Canonisation,