Lettre CMXXXV. À M. Balthazard de Peyzieu

(INÉDITE)

Amitié du Saint pour la famille de Peyzieu. - Pourquoi il faut mépriser les calomnies anonymes.

Annecy, 1er décembre 1613.

Monsieur mon Frere,

Que vous m'obliges grandement a me donner part a ces bonnes et aymables nouvelles du frere Indien , lequel, a mesure que je le sens esloigné de nous selon la distance des lieux, je le sens aussi plus avancé en mon estime, et mon contentement, en la gloire que j'ay d'estre advoué son humble fidelle frere d'acquisition ; mot d'acquisition que j'adjouste pour l'ayse que je reçois d'estre sien, vostre et de toute vostre dependence, car autrement, certes, mon affection me semble toute naturelle en force, vigueur et perpetuité.

J'ay fait nagueres ample response a madame nostre chere seur , et sur le sujet de son desplaysir, bien qu'elle ne m'eut point particularisé quel il estoit, estimant que son porteur, qu'elle pensoit devoir estre monsieur de Rogemont , me diroit tout. Pour moy, apres mon premier sentiment pour la douleur d'une seur si prœtieuse et aymable, je me roydis, et dis que jamais la calomnie qui a honte de marquer son pere, ne fut ni forte pour durer, ni active pour entrer dedans l'esprit des gens qui en ont tant soit peu, et n'arrivera jamais que nostre seur, tant environnee de vertu et de reputation, puisse estre blessee par la mesdisance.

Je luy escris un mot, et vous souhaitant mille et mille vrays contentemens, et a madame ma seur, vostre chere moytié , je suis a jamais sans varier,

Monsieur mon Frere,

Vostre tres humble frere et serviteur,

FRANÇs, E. de Geneve.

[1er] decembre 1613.

A Monsieur

Monsieur de Pezieu.

Revu sur l'Autographe appartenant à Mme la marquise de Mailly, au château de la Roche-Mailly (Sarthe).