Lettre MLXXXI. À la Soeur Favre, Assistante de la Visitation de Lyon

La Mère de Chantal hors de danger. - Nouvelles et avis spirituels.- Salutations aux chères Sœurs et aux bienheureuses Novices.

Annecy, 31 mai 1615.

Ma tres chere Niece, ma Fille,

Je ne sçauroys vous dire combien mon ame se sent obligee a la vostre pour le soin que vous aves eu de me tenir adverti de l'estat de la santé de nostre Mere ( lettre 1075 ). Et Dieu soit loué dequoy il luy a pleu la nous conserver ! Je veux esperer que ce sera plus longuement que la foiblesse de sa complexion ne nous permet d'esperer ; car cette Bonté qui a commencé a nous gratifier, ne s'en lassera point, si nous sommes fideles.

J'eusse bien desiré de vous donner quelque bonne nouvelle en contrechange, mays je n'ay sceu ; car encor que monsieur le President et messieurs les freres et seurs se portent fort bien, si est ce que Nostre Seigneur a retiré a soy le bon oncle, monsieur l'advocat, le jour mesme de l'Ascension , pour bon presage quil luy feroit part du Ciel auquel il estoit monté, menant la captivité captive ( Ep 4,8 ). Aussi ce bon defunct receut tous les saints Sacremens convenables a ce dernier passage et tesmoigna une grande constance.

Ma tres chere Fille, ma Niece, releves tous-jours bien vostre cœur en Nostre Seigneur, esvertues-vous de surmonter toutes les humeurs melancoliques et chagrines, demeures en paix. Amen.

Je suis, plus quil ne se peut dire, tout vostre, et a nos cheres Seurs Marie Peronne et Marie Aymee , et aussi a vos bienheureuses Novices , que j'appelle ainsy par ce que je connois de plus en plus le bonheur de ceux qui se dedient a l'amour et service divin. Je suis tout vostre, ma tres chere Niece, ma Fille.

31 may 1615.

A ma tres chere Fille en N. S.

Ma Seur Me Jaq., ma Niece bienaymee.

Revu sur l'Autographe conservé à la Visitation de Troyes.

MINUTES

ÉCRITES PAR SAINT FRANÇOIS DE SALES

POUR D'AUTRES PERSONNES