Lettre MCLXIX. À Madame de la Fléchère

(INEDITE)

Ou croissent les lis agréables à l'Epoux céleste. - L'ouvrage le plus doux, l'ouvrage le meilleur. - Députer Charles de la Fléchère vers le gouverneur de Savoie.

Annecy, 24 février 1616.

Je vous voy, ma tres chere Fille, selon ce que vous m'escrives, toute jettee sur les espines. 0 prenes courage, je vous en conjure ; c'est la ou les lis aggreables a vostre Espoux croissent ( Ct 2,2 ) et se nourrissent mieux, et le mouton que Dieu volut luy estre immolé au lieu d'Isaac estoit arresté entre les espines ( Gn 22,13). Travailles fidelement, ma tres chere Fille, avec la pointe superieure de vostre volonté, parmi ces tenebres et secheresses ; une once de l'ouvrage fait en cette sorte vaut mieux que cent livres de celuy qu'on fait entre les consolations et sentimens, et bien que celuy ci soit plus doux, l'autre neanmoins est meilleur.

Je communiqueray de vostre affaire avec une bonne cervelle et tres bonne conscience, et vous escriray son advis , combien que tous-jours il faille croire monsieur vostre neveu . J'appreuve bien que vous envoyes vostre filz faire la reverence a Son Excellence , puisque elle ne vous fait nulle response, ni a moy, a qui neanmoins ell'a respondu sur un'autre point dont je luy escrivois ; et selon que vous la verres inclinee, vous pourres par apres recourir a Son Altesse, tandis que la memoire est fraische du defunct .

Je suis sans fin, tout parfaitement vostre, ma tres chere Fille, dans le cœur delaquelle vive a jamais et regne Jesus. Amen.

XXIIII febvrier 1616.

A Madame

Madame de la Flechere.

Revu sur l'Autographe conservé à la Visitation de Riom.