Lettre MCLXV. À Madame de la Fléchère

Affaires de tutelle. - Prudence et sainte indépendance en face du monde. Les prétentions et les plaintes de M. Guidebois. - Un prédicateur de Carême. - Prochains arrangements à la cure de Rumilly.

Annecy, 17 février 1616.

Ma tres chere Fille,

Hier au soir seulement je receus vostre lettre et je respons ce matin, jour des Cendres. Il m'est advis que ces formalités de tuteur a vos enfans sont superflues, puisque tout est vostre et qu'aussi bien vostre Espoux nouveau ne vous demandera point de dote. Neanmoins, vous sçaves quel homme je suis pour les affaires du monde ; certes, je n'y entens rien du tout. C'est pourquoy je vous conseille de croire le neveu , qui, estant de la profession et ayant l'affection quil a pour vous, ne peut en cela que vous bien conduire. Mays il faudra pourtant bien faire sçavoir au monde vostre bonne intention envers vos enfans ; autrement il criera a la Philothee , comme au loup garou ( IVD 4, 1 ), et sera bien ayse de prendre ce sujet: a quoy vostre protestation obviera suffisamment. Que sil ne s'en contente, il le faudra laisser crier et braire tant quil voudra, puisque le nouvel Espoux ne tient aussi point de conte de son tesmoignage ( Jn 2, 25 ).

En verité, il faut ayder M. Guydeboys affin quil ayt sa pension tant que nous pourrons, car le pauvre homme seroit miserable sans cela et auroit grand sujet de se plaindre ; et vous pouves penser de quel air il le feroit, puisque il le fait des a present avec un'extreme doleance. Vous m'envoyeres donq les papiers et je vous renvoyeray ce que vous me marqueres, et l'assisteray en ce que je pourray, affin quil ne soit pas frustré de sa juste pretention. Et M. le Comte n'en sçaura rien, ou sil le sçait, il n'aura point d'occasion de vous en sçavoir mauvais gré.

Les sentimens de l'absence du defunct ne peuvent pas si tost passer ; il suffit que, en la pointe de l'esprit, nous soyons bien resignés au bon playsir de Dieu, et que nous taschions de nous unir de plus en plus parfaitement au second Espoux. Demeures bien toute en luy et vives bien toute pour luy, ma tres chere Fille, et je suis tout parfaitement

Tout vostre.

Nous avons un brave prœdicateur , je m'en res-jouis grandement. Vous l'ouires un peu sur la fin , et madame la Comtesse , a laquelle j'ay bien envie de donner de la moderation en ses affections, selon le besoin que j'en voy par la demesuree ardeur qu'ell'a en la sollicitation de faire M. Nacot , vicaire. Or bien, nous sommes apres a donner un fort bon coadjuteur au curé , et alhors tous ces inconveniens cesseront.

Dieu soit a jamais au milieu de nos cœurs. Je salue la chere compaigne et la tres chere niece , quand vous luy escrires.

Jour des Cendres.

A Madame

Madame de la Flechere.

Revu sur une copie déclarée authentique, conservée à Turin, Archives de l'Etat.