Lettre MCLXVI. À Madame de Mieudry

Etre ce que Dieu veut : faibles de corps, mais siens de cœur. - Nouvelles difficultés dans le service paroissial de Rumilly. - L'Evêque se justifie humblement, sans blâmer ses détracteurs, - Les " caprices des hommes. " - Soyons " vaysseaux bien profons " pour recevoir les grâces de Dieu.

Annecy, 19 février 1616.

Et moy certes, ma tres chere Fille, j'oubliay a vous dire que, sans nulle difficulté, vous mangeassies, avec M. vostre pere et vos enfans , de la chair ; vostre complexion est asses lasse sans autre abstinence. Il faut estre ce que Dieu veut que nous soyons : foibles, vilz, abjectz, mais siens de cœur, d'intention et de resolution. Pour M. vostre mari et le reste, vous en feres ce que vous estimerés a propos ; je croy bien que ce ne sera pas trop de luy donner des conseilz, attendu quil craint Dieu, et quil faut avoir soin de bien nourrir ceux qui nourrissent bien cette sainte crainte, encor que ce soit avec imperfection.

Le vicariat de Rumilly depend du curé ; ce que j'ay fait pour condescendre a l'extreme instance qui m'a esté faite, c'est de luy permettre quil employast M. Nacot, si bon luy sembloit, sans pour cela empescher que l'on employast M. Charvet a cet exercice, pour ceux qui n'auroyent pas agreé l'autre. Il se peut bien faire que j'aye mal fait en cela, et ce ne seroit pas un grand miracle ; mais je ne le pense pas pourtant, a cause de la consideration pour laquelle je l'ay fait et la liberté que chacun a de se praevaloir des autres prestres ; outre que cela ne durera comme rien, Dieu aydant. Ne vous mettes nullement en peine de respondre a ceux qui m'en blasmeront ; car encor que je ne le pense pas, peut estre ont ilz rayson. Et pour vous, il vous suffit que je vous assisteray bien et ne vous tromperay point, ains vous conduiray le droit chemin de la pieté, avec un' affection et un zele tres invariable.

Je considere les caprices des hommes sur le sujet du bon M. de Valence : nous l'escoutons icy de tres bon cœur, et moy, qui ay plus estudié en theologie que tous ceux de Rumilly ensemble, je treuve qu'en verité il presche bien et utilement ; on seroit bien ayse en des plus grandes villes de l'avoir ( note 361 ). Il faut avoir patience, et prier Dieu quil nous face tous humbles, affin que, comme vaysseaux bien profons, nous soyons capables de recevoir ses graces en abondance.

Je suis en vraye verité tout vostre, ma tres cbere Fille, et Dieu soit la vie de vostre ame.

Le XIX febvrier 1616.

A Madame

Madame de Mioudry.

Revu sur une copie déclarée authentique, conservée à Turin, Archives de l'Etat.