Lettre MCCLXXXV. Au Prince de Piémont, Victor-Amédée

L'Evêque de Genève sollicite la confirmation de M. de Charmoisy dans une charge.

Grenoble, 3 mars 1617.

Monseigneur,

Vostre Altesse ayant fait lhonneur a monsieur de Charmoysi de non seulement l'employer, mays aussi aggreer son service, jusques a luy vouloir asseurer la charge qu'il avoit exercee, je supplie tres humblement vostre bonté, Monseigneur, de luy faire jouir du fruit de cette grace. En quoy, bien que je sois son parent, je ne me relascherois pas de le recommander si librement, si je ne voyois que cet honneur ne luy peut meshuy manquer sinon avec beaucoup de perte de sa reputation aupres de monsieur le Grand de France , monsieur d'Alincourt et plusieurs autres seigneurs du voysinage, qui, ayans sceu et luy ayans tesmoigné de se res-jouïr que Vostre Altesse l'en vouloit gratifier, attribueroyent le manquement a quelque degoust qu'il eut donné despuis en l'exercice de cet office, lequel au reste je m'asseure quil fera dignement et au gré de Son Altesse et de la Vostre, Monseigneur, si elle l'yestablit .

Je prie Dieu qu'il accroisse de plus en plus ses benedictions sur Vostre Altesse, a laquelle je fay tres humblement la reverence, et suis infiniment,

Monseigneur,

Tres humble, tres obeissant et tres fidele

orateur et serviteur,

FRANÇs, E. de Geneve.

III mars 1617, a Grenoble.

Revu sur l'Autographe conservé à Turin, Archives de l'Etat.