Lettre MCCLXXXVII. Au Même

Un écclésiastique qui porte les armes et extorque des lettres de faveur au duc de Savoie. - Comment faire cesser un pareil abus.

Grenoble, 5 mars 1617.

Monseigneur,

Il y a long tems que le doyen de Choysi, prestre , fait profession de conduire des soldatz et suivre l'armee, voulant neanmoins tirer les fruitz de son decanat sur le Chapitre et eglise de Salanche ( note 852 ), comme sil faysoit la residence a laquelle il est obligé. Et par ce qu'il sçait que ledit Chapitre ne peut en conscience les luy distribuer, ni moy permettre qu'il en jouïsse de la sorte, il obtient de tems en tems des lettres par lesquelles Son Altesse Serenissime commande audit Chapitre de delivrer lesditz fruitz. Mays je suis asseuré, Monseigneur, que si Son Altesse sçavoit la qualité de l'homme, elle le renvoyeroit a son devoir, et ne voudroit pas que l'Ordre ecclesiastique fut violé a son occasion, puisque mesme il n'a rien de si recommandable en la profession militaire que Son Altesse en puisse attendre aucun notable service.

Et d'autant que j'en parlay a Vostre Altesse lhors que nous avions le bonheur de sa presence de deça, et qu'elle tesmoigna de treuver mes remonstrances dignes d'estre protegees, je la supplie tres humblement de me commander ce que j'auray a respondre, avec ce Chapitre-la, aux lettres reiterees de Son Altesse que ce mauvais prestre obtient, et par lesquelles il presse plus ce Chapitre qu'il ne sçauroit faire par aucune autre voye, la seule ombre de la volonté de saditte Altesse nous estant en extreme reverence.

Je prie Dieu quil la conserve, et la Vostre,

Monseigneur, delaquelle je suis

Tres humble et tres obeissant et tres fidele

orateur et serviteur,

FRANÇs, E. de Geneve.

5 mars 1617, a Grenoble.

Revu sur l'Autographe conservé à Turin, Archives de l'Etat .