Lettre MCCLXXIV. À la Mère Favre Supérieure de la Visitation de Lyon

Changement de confesseur au monastère de Lyon. - Trois retraitantes en celui d'Annecy. - Rapide passage en ce monde d'une petite nièce du Saint.

Annecy, 21 janvier 1617.

Ma tres chere Fille,

Je vous voy, certes, asses occupee parmi tant d'occurrences ; Dieu soit a jamais vostre force.

M. l'Aumosnier m'escrit que Monseigneur l'Archevesque le vous oste ; je croy que ce ne sera pas sans vous bien pourvoir. Je crains pourtant la varieté des opinions au maniement des ames ; mays Dieu aura soin de vostre chere trouppe, affin qu'elle aille tous-jours le mesme chemin, puisque c'est celuy auquel il l'a mise.

Nostre Mere ne sçait pas que j'escrive. Elle n'est pas sans affaires, mays bonnes et aggreables, ayant madame la Comtesse de Tournon et ses deux filles , qui font les exercices et preparent leur confession generale.

Hé Dieu, quelles nouvelles du Puy d'Orbe ! cela me traverse le cœur. O qu'il faut bien regarder a qui l'on donne acces en telles maysons, et quelles hantises, quelz devis on admet !

La chere seur de la Valbonne pensoit venir, mais le frere n'a pas voulu. Il y a obeissance en leur monastere ; ouy, et mortification. Mais celle ci est bien plus grande a Sales, ou ma seur a fait sa troisiesme couche d'une fille, laquelle, une heure apres son Baptesme, est morte. Pour moy, je n'en aurois nul sentiment, si ce n'est pour compatir un petit avec la mere.

Vivés tous-jours toute a Dieu, ma tres chere Fille : c'est le continuel souhait de mon cœur qui cherit le vostre incomparablement.

VIVE JESUS !

FRANÇs, E. de Geneve.

21 janvier 1617.

A ma tres chere Fille en N. S.,

Ma Seur Marie Jacqueline Favre,

Superieure de la Cong on de la Visitation.

A Lion.