Lettre MCCLXXI. Au Duc de Nemours, Henri de Savoie

(INÉDITE)

Regrets de l'Evêque de Genève d'avoir quitté Annecy avant l'arrivée du prince. - Le duc de Nemours, futur fondateur de l'église des Barnabites.- Dieu. " donne séjour dans son temple aeternel a ceux qui luy en font icy bas des temporelz. " - Reconnaissance des Religieux et du peuple.

Annecy, 8 janvier 1617.

Monseigneur,

L'ors que Vostre Grandeur vint en cette ville , je me treuvay si pressé de l'assignation prœfigee pour les sermons de l'Advent a Grenoble ( note 774 ), que je ne peu attendre le bonheur de vostre arrivee ; dont j'eu un extreme desplaysir, mais addouci neanmoins par l'esperance qui me restoit, qu'a mon retour je pourrois en quelque sorte regaigner cet honneur. Et maintenant, deceu en mon attente, je ne puis me contenir que je ne me pleigne de mon malheur et que, pour me soulager au mieux que je puis, je ne vous supplie tres humblement, Monseigneur, que si les occurrences m'esloignent de vostre œïl, il vous playse me tenir prœsent en vostre grace, que j'estime l'un des meilleurs et plus desirables honneurs que je puisse posseder en ce monde.

Ce pendant, Monseigneur, les Peres Barnabites m'ayant communiqué l'intention que Vostre Grandeur a de faire bastir leur eglise, m'ont aussi donné une grande consolation ; car je sçai que Dieu benit ceux qui luy edifient des maisons, qu'il glorifie ceux qui l'honnorent et qu'il donne sejour dans. son temple aeternel a ceux qui luy en font icy bas des temporelz. Tout ce pais, Monseigneur, et les circonvoysins vous en auront un'obligation immortelle ; et par ce moyen, Vostre Grandeur adorera et priera Dieu continuellement a jamais, en la personne de ces bons et devotz Religieux et de tous ceux qui, par leur zele, s'assembleront en ce saint lieu pour y sanctifier le nom divin. Mays en particulier, Monseigneur, je vous en fay tres humble remerciment au nom de tous ceux qui, estans vos tres humbles et tres obeissans sujetz et serviteurs, sont mes diocaesains, ausquelz je ne manqueray pas de representer la singuliere redevance qu'ilz en auront a vostre pieté ; non plus que ces bons Peres ne manqueront pas de rendre memorable a toute leur illustre et devote Congregation la grandeur des bienfaitz dont vous les aves favorisés, Monseigneur, qui n'aves pas seulement voulu les recevoir en vostre ville ( L6, notes 462, 560. ), qui est leur premier logement deça les mons, mais de plus, leur aures basti le lieu sacré qui sera le plus grand moyen de bien rendre le service auquel leur vie est destinee.

Dieu remplisse a jamais Vostre Grandeur de ses graces ; c'est le souhait perpetuel, Monseigneur, de

Vostre tres humble et tres obeissant

orateur et serviteur,

FRANÇs, E. de Geneve.

8 janvier 1617, Annessi.

Revu sur l'Autographe appartenant à Mme veuve de Marcassus, à Monfort (Gers).