Lettre MCCLXXII. Au Prince de Piémont, Victor-.amédée

L'imprudence d'un jeune homme. - Avis du Saint sur cette affaire.

Annecy, 17 janvier 1617.

Monseigneur,

Vostre Altesse me renvoya une requeste par laquelle elle estoit suppliee, de la part de damoyselle Marceline de Marcilli, ditte Belot , de luy prouvoir sur les promesses que le sieur de Chasse, filz de monsieur le President de Sautereau ( notes 762,763) , luy avoit faites pour mariage, affin que je fisse ce que j'estimerois estre convenable pour ce regard et que je donnasse mon advis a Vostre Altesse sur le contenu de la supplication.

Et pour obeir, Monseigneur, a son decret, estant a Grenoble, je conferay avec le susdit seigneur Prresident de Sautereau de ce sujet, pour apprendre de luy son intention, laquelle il m'expliqua, se loüant infiniment de la justice et equité dont Vostre Altesse l'avoit gratifié luy faysant rendre la promesse faite par son filz, lequel estant en la puissance de son pere, et d'un tel pere, ne pouvoit nullement s'engager en un mariage si deshonnorable, au praejudice de la reputation de sa famille. De sorte que, non seulement il ne croyoit pas que cette femme peut rien praetendre par rayson, mais tenoit pour certain qu'elle pourroit estre recherchee par justice, d'avoir seduit et attiré un jeune garçon, enfant de telle famille, a des promesses si praejudiciables et conceües en termes si extravagans . Que si ce n'eut esté la crainte de donner de l'importunité a Vostre Altesse, il l'eut supplié de commander que punition en fut faite.

N'ayant donq rien fait de ce costé, il reste que je die mon. advis, puis qu'il a pleu a Vostre Altesse de me le commander. Et c'est, Monseigneur, qu'il suffit bien que l'on tolere ces femmes scandaleuses en la republique, sans qu'on leur permette d'entreprendre sur les maysons honnorables et dignes de recommandation, par les infames attraitz desquelz elles charment la foible et legere jeunesse ; et la condition d'espouser ou doter n'est ordonnee que pour les filles d'honneur qui ont esté deceües, non pour les femmes deshonnestes qui ont deceu. Celle ci, comme je m'asseure Vostre Altesse aura des-ja sceu, venoit de faire un enfant d'un estranger quand elle tira promesse de ce jeune gentilhomme ; et bien que la charité ayt quelquefois porté des gens de qualité a prendre en mariage des femmes perdues pour les sauver, si est ce qu'il n'en faut pas tirer consequence pour ceux qui, n'estans pas a eux mesme (sic), sous praetexte de charité violeroyent la justice et l'equité, introduisans en leurs familles des personnes dangereuses contre le gré de ceux qui sont les peres et maistres de la famille, mays sur tout en un aage qui n'a pas ordinairement en consideration ni la charité, ni la prudence requise pour exercer une charité en laquelle il faut avoir egard a plusieurs circonstances.

Je prie Dieu sans cesse, Monseigneur, quil comble Vostre Altesse de ses plus desirables benedictions, et suis infiniment,

Monseigneur,

Vostre tres humble, tres obeissant et tres fidele

orateur et serviteur,

FRANÇs, E. de Geneve.

XVII janvier 1617, Annessi.

Revu sur l'Autographe appartenant aux Religieuses de l'Adoration réparatrice, à Paris.