Lettre MCCCXVII. Au Baron Amédée de Villette

Deuil profond. - Pleurs et résignation de Marie-Aimée. - Adhésion au vouloir de Dieu.

Annecy, 30 mai 1617.

Monsieur mon Oncle,

Helas ! il n'est que trop vray que vous aves perdu un tres humble neveu et fidele serviteur, et moy mon tres cher frere que j'aymois incroyablement pour plusieurs bonnes raysons, outre celle du sang. C'est quasi un songe de gens qui veillent, de sçavoir ce pauvre garçon mort aussi tost qu'arrivé en ce païs-la , et sans avoir eu le loysir d'avoir veu le Prince auquel il alloit consacrer sa vie et son courage.

Or, apres toutes les idees que le desplaysir me donne, je conclus que Dieu l'ayant voulu, ç'a esté le mieux. Que son nom soit beni ( Jb 1,21 ), et les decretz de sa volonté adorés es siecles des siecles. A men.

Certes, je croy bien que M. de Giez, mon cousin , M. le Baron de Bonvilaret et mon neveu du Vuaz auront ressenti grandement cette perte, comme sçachant que ce pauvre trespassé les cherissoit et honnoroit tres particulierement, selon que la nature et plusieurs considerations l'y obligeoyent ; mais s'il leur manque, ce n'est pas par son eslection, ni par sa faute. Dieu, par sa bonté, les veuille proteger et conduire parmi les hazars ou cette guerre les porte.

Ma pauvre chere seur tesmoigne entre ses pleurs et regretz la plus aymable, constante et religieuse pieté qu'il est possible de dire : en quoy elle nous contente extremement, pour le desir que nous avons qu'elle conserve l'enfant que nous croyons, par bonnes conjectures, avoir esté laissé en ses flancs par le defunt, comme pour quelque sorte d'allegement a ses freres.

Que vous diray-je plus, Monsieur mon cher Oncle ? Ce pauvre garçon decedé s'estoit destiné a la vie militaire, et pouvoit mourir de cent façons plus lamentables que celle de laquelle il est mort. Beni soit Dieu qui l'a ravi devant les duelz, les mutineries, les desespoirs, et en somme devant ces innombrables occasions d'offencer Dieu que cette espece de vacation donne en ce miserable aage.

Et pour tout, je ne puis dire autre chose, sinon : !ta, Pater, quoniam sic placitum fuit ante te ( Mt 11,26 ). J'acquiesce et dis Amen, non seulement sur les paroles, mais aussi sur les œuvres de Dieu, le suppliant qu'il vous conserve, et demeurant pour jamais,

Monsieur,

Vostre tres humble neveu et fidele serviteur,

FRANÇs. E. de Geneve.

Le 30 may 1617.