Lettre MCCCXXIX. Au Duc de Savoie, Charles-Emmanuel 1er

( MINUTE )

François de Sales sollicite l'indulgence de Charles-Emmanuel pour un homme plus malheureux que coupable. - Les deux ailes de la renommée des bons princes.

Thonon, 7 juillet 1617.

Monseigneur,

Je demande tres humblement pardon a Vostre Altesse, si, en un tems auquel elle est environnee de tant d'affaires de consequence , je prens la confiance en sa douceur de luy presenter cette supplication, a laquelle je suis forcé par le devoir que ceux de ma condition ont de compatir aux miserables et soulager les desolés, lors mesme qu'ilz sont abandonnés de tout autre secours.

Apres, donq, avoir bien sceu que l'estrange accident advenu au sieur [Président Crespin] estoit procedé de malheur, plustost que d'aucune malice ou deliberation ; voyant qu'en une si extreme tribulation il recouroit a moy pour obtenir, par ma tres humble intercession, l'acces aux pieds de Vostre Altesse, je ne l'ay peu ni voulu esconduire, de peur d'offencer Celuy qui jugera les vivans et les mortz selon l'assistence qu'ilz auront. faite aux affligés ( Mt 25,34 ), puysque mesme les deux personnes qui ont esté les plus touchees en ce desastre semblent conspirer au desir de la consolation de celuy auquel il est arrivé : car la fille ne souhaite rien tant que d'avoir son pere, puisqu'elle a perdu sa mere ; et quant a monsieur [l'Abbé de la Mente ,] soit qu'il ayt eu compassion de ce pere et de cette fille, soit qu'il ayt esté animé de ce divin Esprit qui nous fait vouloir du bien a ceux qui nous font du mal ( Mt 5,44 ), il a des-ja protesté qu'il ne vouloit procurer aucune punition, ni faire partie.

Reste l'œil du publiq qui, je m'asseure, regardera avec edification la grace d'un homme qui a tant de raysons et de justes excuses, ainsy que Vostre Altesse jugera bien, si elle commande que rapport luy soit fait de cette desadventure, selon qu'il en resultera des procedures de justice. Et partant, Monseigneur, la faveur que Vostre Altesse fera a cette calamiteuse famille sera egalement ornee de justice et de misericorde, qui sont les deux aisles sur lesquelles l'aggreable renommee des bons princes vole et au Ciel et en terre, parmi mille benedictions et de Dieu et des hommes.

Playse donq a vostre debonnaireté, Monseigneur, de tendre sa main secourable a ce pauvre desolé, et d'excuser la liberté avec laquelle je luy propose ce bon œuvre, protestant que c'est avec toute la tres humble reverence que je doys a Vostre Altesse, a laquelle je souhaite le comble de toute sainte prosperité, demeurant a jamais,

Monseigneur,

Son tres humble, tres obeissant et tres fidele

orateur et serviteur,

FRANÇs, E. de Geneve.

Le 7 juillet 1617, a Thonon.