Lettre MCCCXXIII. À la Mère de Chantal

( INÉDITE)

Paternelle sollicitude pour la santé de la Mère de Chantal. - Ne pas se contenter d'attendre les âmes, mais leur aller au-devant. - La pureté en ce monde. - Désirs d'une sainte mère pour sa fille.

Viuz-en-Sallaz, 29 juin 1617 .

Je suis tous-jours bien brave homme a me porter bien icy et par tout, et n'y a rien a craindre, ma tres chere Mere. Mais, comme me pourrois-je empescher d'estre en peine de ce que je suis la, quant a la santé ? Pour Dieu, ne parles pas beaucoup, soulages vous, et vous tenés un peu tranquille tant d'esprit que de cors; car le premier accident vous arriva apres le traitté avec M. de la Roche , ou vous ne fustes pas sans parler avec affection, et puis le tracas des malades fit venir le second. Travailles, ma tres chere Mere, mais tout bellement, tout doucement, tranquillement.

Je suis consolé que nos pauvres filles soyent un peu allegees, car je les cheris d'un cœur plus que paternel toutes, et vous sçaves que j'ayme particulierement cette pauvre Marie Gasparde de tous tems, et, maintenant qu'elle est malade, encor plus tendrement ( note 81 ). Nous continuerons a faire prier pour elles.

J'ay pensé sur cette chetifve fille dont je vous escrivis ; et en fin, si elle veut faire une retraitte pour se resoudre, il faut non seulement la recevoir, mais, sil se pouvoit, luy aller au devant . Qui sçait si Dieu aura pitié d'elle et luy pardonnera ? Son mauvais naturel ne m'estonne point, car Nostre Seigneur fait quelquefois les enfans d'Abraham des pierres ( Mt 3,9 ) . La conversion ne depend pas de la nature, mais de la grace. Je voy que cette venue apportera de l'incommodité, mais, peut estre, bienheureuse incommodité, qui se prend pour recueillir l'estranger par l'hospitalité spirituelle. Saint Pierre, prince des pœnitens, est devant mes yeux, qui fut si doux aux pecheurs apres quil ne le fut plus.

Je suis bien en peine de l'autre chere fille, que nous cherissons tant en suite de la dilection de sa mere ; car je ne sçai bonnement comme en parler a sa mere , qui en recevra bien du desplaysir, estant bien esloignee de cette humeur-la. Je m'essayeray de l'attirer en confession et de la faire bien confesser , car de la depend sa delivrance. Il est vray, ma tres chere Mere , il y a peu de pureté en ce monde, sinon celle que la pœnitence opere et la vie devote.

Or bien, je vous escriray a toutes occurrences, ma tres chere Mere ,

mon cœur et ma vie ne pouvant subsister avec consolation que par l'unité quil a pleu de faire a Dieu de nous, affin qu'aeternellement nous fussions siens.

Madame de la Flechere de ce pais , qui vint hier faire sa reveüe, vous bayse mille fois les mains. C'est une sainte ; elle a grand desir de vous aller voir et de vous mener une sienne brave fille a mon gré, laquelle est aagé (sic) de 19 ans, et, par ouï dire, est un peu touchee d'estre de la Visitation ; et cette bonne mere , qui en brusle, estime que la veüe la fera resoudre .

Dieu vous conserve,.ma tres chere Mere , et remplisse a jamais nostre unique ame de son tres pur amour. Amen.

A Viu, le jour des deux saints amans, saint Pierre et saint Paul.

A ma tres chere Mere.

A la Visitation.

Revu sur l'Autographe conservé à la Visitation de San Vito al Tagliamento (Italie).